«Արթիկ» ՔԿՀ դատապարտյալը պարտվեց «Նուբարաշեն» ՔԿՀ պետի նախկին տեղակալին

ՀՀ ԱՆ «Արթիկ» ՔԿՀ դատապարտյալ Արտակ Հակոբյանի հայցն ընդդեմ «Նուբարաշեն» ՔԿՀ պետի օպերատիվ գծով նախկին տեղակալ, «Վարդաշեն» ՔԿՀ դատապարտյալ Դավիթ Մուրադյանի այսօր մերժվեց:

Դատավճիռը կայացվեց Էրեբունի և Նուբարաշեն վարչական շրջանների ընդհանուր իրավասության դատարանում, դատավոր Երեմ Եսոյանի նախագահությամբ: Վճռի հրապարակմանը Արտակ Հակոբյանը ներկա չէր: Նշենք, որ դատապարտյալ Արտակ Հակոբյանը հայց էր ներկայացրել ընդդեմ բախտակից Դավիթ Մուրադյանի` որպես զրպարտությամբ բարոյական վնասի հատուցում` 1 մլն 700 հազար դրամի բռնագանձման պահանջի մասին:

Դատապարտյալի կինը՝ Կարինե Հակոբյանը, Armlur.am-ին հայտնեց, որ դատավճիռն իրենք բողոքարկելու են Վերաքննիչ քրեական դատարան: «Դատավոր Երեմ Եսոյանն անօրինական վճիռ է կայացրել: Սա դատավորի կողմից կոմնակալության ակնհայտ միտում է: Ու սրա պատճառն այն է, որ ամուսինս դատարաններում բազմիցս բարձրաձայնել է համակարգում տեղի ունեցող անօրինականությունների մասին: Բայց քանի որ նա դատապարտյալ է, համապատասխան կառույցներն ուշադրություն չեն դարձրել ամուսնուս խոսքերին»,- ասաց Կարինե Հակոբյանը՝ հավելելով, որ թե՛ ինքը, թե՛ ամուսինը դատավորից արդար վճռի կայացում չէին սպասում:

Դատարան ներկայացված հայցադիմումով հայցվոր Արտակ Հակոբյանը հայտնել է. «Դավիթ Մուրադյանը արատավորել և վարկաբեկել է իր անձը նախաքննական մարմնի մոտ, ինչպես նաև դատական նիստերի ժամանակ, գրավոր և բանավոր անհիմն հայտարարություններ է արել, թե իբր ինքը և Դավիթ Մուրադյանը համագործակցել են, ինչի արդյունքում կալանավորվել և դատապարտվել է: Այս ամենը սուտ է և զրպարտություն է: Դավիթ Մուրադյանն այդ շանտաժն անելով՝ նպատակ է ունեցել իր վրա հոգեբանական ճնշումներ գործադրել, որպեսզի իր կողմից կատարված կաշառակերության գործի առիթով բողոք չներկայացնի: Դավիթ Մուրադյանը արատավորել է իր անձը՝ զրպարտելով իրեն»:

Իսկ պատասխանող Դավիթ Մուրադյանի ներկայացուցիչ Մնացական Ղազարյանն առարկել է հայցի դեմ: Նշել է, որ ներկայացված հայցադիմումում ներկայացված հայցի հիմքն ու առարկան բարոյական վնասի հատուցումն է, մինչդեռ ինչպես նախնական, այնպես էլ դատաքննկան փուլում հայցվոր կողմը պնդել է, որ 1 մլն 100 հազար դրամը կազմում է բուժման, դեղորայքի, իսկ 6 հարյուր հազար դրամը՝ բարոյական վնասի փոխհատուցման գումարը: Փաստորեն, բարոյական վնասի պահանջը դարձավ նյութական և բարոյական պահանջ: Նյութական վնասի հետ կապված օրենսդիրը և վճռաբեկ դատարանն ունեն մի շարք նախադեպային որոշումներ, որոնցով քաղաքացիական օրենսգրքի 17, 1087 հոդվածների վերաբերյալ դատական պրակտիկան միասնականացնելու համար որոշել է, որ մասնակից կողմը պարտավոր է ապացուցել, որ առկա է հակաօրինական արարք, առկա է նյութական վնաս և առկա է պատճառահետևանքային կապ հակաօրինական վարքագծի և պատճառված վնասի միջև:

Ինչ վերաբերում է 1 մլն 100 հազար դրամ գումար նյութական վնասին, ապա այդ հանգամանքը հիմնավորող որևէ ապացույց չներկայացվեց: Չի ներկայացվել նաև ապացույց նյութական վնասի պատճառման և իր վստահորդի գործողությունների միջև առկա հակաօրինական գործողության: Ինչ վերաբերում է բարոյական վնասին, նշեց, որ հայցվորի կողմից ոչ մի ապացույց չի ներկայացվել: Վկայակոչելով ՀՀ քաղաքացիական դատավարության օրենսգրքի 48 հոդվածը՝ Մնացական Ղազարյանը նշեց, որ դատարանը չպետք է ապացույցները հավաքագրի, այն պետք է տրվի այդ փաստը վկայակոչած կողմի կողմից: Նշեց, որ գոնե մինչև այս պահը հայցվորի կողմից դատարանին չի ներկայացվել որևէ ապացույց՝ հիմնավորելու համար պատասխանողի գործողություններով իրեն պատճառված վնասի վերաբերյալ: Միաժամանակ նշել է, որ փաստաբանի խելամիտ վարձատրության պահանջ չունեն:

Նշենք նաև, որ Դավիթ Մուրադյանը դատապարտվել է 8 տարվա ազատազրկման Արտակ Հակոբյանից 14 հազար դոլար և 760 հազար դրամ կաշառք պահանջելու և ստանալու մեղադրանքով: Իսկ մեղադրող դատախազ Վահագն Մուրադյանը միջնորդել էր նրան դատապարտել 12 տարվա ազատազրկման: Մեղադրողը գտնում էր, որ Դ. Մուրադյանին մեղսագրված արարքները լիովին ապացուցված են, և նրա արարքները համապատասխանում են ՀՀ քրեական օրենսգրքի 311-րդ հոդվածի 4-րդ մասի 2-րդ կետի հատկանիշներին (խոշոր չափերով կաշառք ստանալը):

Դ. Մուրադյանը, 2011թ. դեկտեմբերի 1-ից մինչև 2013թ. փետրվարի 6-ն աշխատելով որպես ՀՀ ԱՆ «Նուբարաշեն» ՔԿՀ-ի պետի տեղակալ, օժտված լինելով քրեակատարողական հիմնարկի օպերատիվ և բժշկական սպասարկման բաժինները համակարգելու լիազորությամբ, 2012թ. օգոստոսից մինչև դեկտեմբերն ընկած ժամանակահատվածում առանձնապես խոշոր չափերի կաշառք է պահանջել և ստացել նույն քրեակատարողական հիմնարկում պատիժ կրող, միջին ծանրության հանցագործություններ կատարելու համար 5 տարի 6 ամիս ժամկետով ազատազրկման դատապարտված Արտակ Հակոբյանից:

Կաշառքն, ըստ մեղադրողի, ամբաստանյալը ստացել է՝ դատապարտյալի օգտին իր լիազորությունների շրջանակներում գործողություններ կատարելու համար, մասնավորապես՝ առանց բավարար հիմքերի՝ դատապարտյալին ՔԿՀ-ի բուժմաս տեղափոխելու, տևական ժամանակ այնտեղ պահելու, դատապարտյալին նրա կնոջ հետ ոչ պլանային երկարատև և կարճատև տեսակցություններ տրամադրելուն նպաստելու, ինչպես նաև ծառայության գծով հովանավորչության, պատժախցի վերանորոգումը թույլատրելու, այն կահավորելու և սահմանված կարգի խախտմամբ բջջային հեռախոս պահելու և դրանից օգտվելու համար: Արտակ Հակոբյանից, ըստ մեղադրողի, ամբաստանյալը պահանջել և որպես կաշառք դատապարտյալից անձամբ և նրա կնոջից՝ Կարինե Հակոբյանից, ստացել է ընդհանուր առմամբ 1 մլն 631 հազար 320 դրամին համարժեք 4 հազար դոլար, ինչպես նաև 540 հզար դրամ արժողության կահույք:

Լուսանկարը՝ iravaban.net-ի

Տաթև Հարությունյան