Արդարադատության նախարար Հովհաննես Մանուկյանն այսօր լրագրողների հետ զրույցում նշեց, թե Հայաստանի էլեկտրական ցանցերի թույլ տված չարաշահումների հարցը բավական լուրջ է և ոտքի վրա այդ ամենի մասին խոսելն անհնար է: «Ես կարծում եմ, որ սա մի իրավիճակ է, որից պետք է դասեր քաղել: Մենք պետք է դասեր քաղենք նաև հետագայի համար»,- նշեց նա:
– Ի՞նչ դասերի մասին է խոսքը:
– Ընդհանրապես` և՛ օրենսդրական կարգավորումների տեսանկյունից, և՛ վերահսկողական ավելի արդյունավետ մեխանիզմների տեսանկյունից:
– Վերահսկողական մեխանիզմները բավարա՞ր չեն:
– Իսկ Դուք գտնում եք, որ բավարա՞ր է: Ես ասում եմ, որ մենք պետք է դասեր քաղենք, այդ թվում` նաև վերահսկողական ավելի արդյունավետ մեխանիզմներ ունենալու համար:
– Ձեզ համար տարօրինակ չէ՞, որ Էներգետիկայի նախարարը հայտարարում է, որ գողություն է տեղի ունեցել, բայց գործ չի հարուցվում:
– Երվանդ Զախարյանը իրավաբան չէ, չի ղեկավարում իրավական կառույց, և նա իր ելույթներում կարող է օգտագործել տերմինալոգիա, որը իրավաբանների տերմինալոգիայի հետ համահունչ չէ: Ես կարծում եմ, որ այս հարցը պետք է ուսումնասիրության առարկա դառնա կոմպետենտ մարմինների կողմից: Կարծում եմ, որ, այնուամենայնիվ, եթե ինչ-որ տեղ խախտումներ հայտնաբերվեն, այդ թվում` քրեաիրավական բնութագրիչ ունեցող խախտումներ, վստահ եմ, որ մեր իրավապահները համապատասխան արձագանք կտան:
.gif)
