Սերժ Սարգսյանը ՀՀԿ համագումարում իր ելույթը կառուցելիս հավանաբար որոշել էր շարժվել հայտնի ասացվածքի տրամաբանությամբ. «Երբեք այդքան չեն ստում, որքան պատերազմի ժամանակ, որսից հետո եւ ընտրություններից առաջ»: Խոստովանենք՝ դա նրան հաջողվել էր: Ընդ որում, հաջողվել էր բավական լավ, որովհետեւ նրա հռչակած «ապահով Հայաստանը» որեւէ աղերս չունի իրականության հետ:
Օրինակ՝ Սերժ Սարգսյանն իր ելույթում հայտարարել է. «Մենք սկսել ենք քայլ առ քայլ դեպի լուսանցք տեղափոխել երկրում տասնամյակներ շարունակ արմատներ ձգած կոռուպցիան ու չարաշահումները»: Թե որքանով է իշխանություններին հաջողվել կոռուպցիան տեղափոխել լուսանցք, վկայում են միջազգային հեղինակավոր կազմակերպությունները: «Թրանսփարենսի ինթերնեյշնլ» միջազգային հակակոռուպցիոն կազմակերպության՝ դեկտեմբերի սկզբներին հրապարակած զեկույցի համաձայն՝ ՀՀ-ն կոռուպցիայի մակարդակով 176 երկրների շարքում կիսում է 105-112-րդ տեղերը՝ Ալժիրի, Բոլիվիայի, Կոսովոյի, Մալիի, Մեքսիկայի եւ Ֆիլիպինների հետ միասին: Ու եթե 2011 թվականի զեկույցում Հայաստանում կոռուպցիայի ցուցանիշը 2.6 էր, ապա այս տարի այն մի փոքր ավելացել է՝ դառնալով 2.7: Կոռուպցիայի դասական օրինակ էր նաեւ ԱԺ ընտրությունների ժամանակ տեղի ունեցածը, երբ ընտրակաշառքը բաժանվում էր մասսայականորեն:
Սերժ Սարգսյանն իր ելույթում նաեւ հայտարարել է. «Մենք կարողացել ենք Հայաստանը դարձնել գործարարի համար անհամեմատ ավելի գրավիչ ու ներդրումների համար անհամեմատ ավելի հուսալի երկիր»: ՀՀ ազգային վիճակագրական ծառայության հրապարակած տվյալները, սակայն, վկայում են բոլորովին այլ իրավիճակի մասին. գործարարի համար գրավիչ ու հուսալի երկրում պարզապես նվազել են օտարերկրյա ներդրումների ծավալները: Ըստ «ՀՀ սոցիալ-տնտեսական վիճակը 2012թ. հունվար-հոկտեմբերին» վերնագրով զեկույցի. «2012թ. հունվար-սեպտեմբերին տնտեսության իրական հատվածում օտարերկրյա ներդրումների հոսքերի ծավալը կազմել է 391.1 մլն դոլար, որը 2011թ. նույն ժամանակաշրջանի համեմատ նվազել է 35.2%-ով»: Բացի այդ, այս տարիներին իշխանության բարեհաճությունը չվայելող գործարարներն իրենց բիզնեսը տեղափոխել են Հայաստանից դուրս, հիմնականում՝ Վրաստան:
Ս. Սարգսյանը համագումարի ժամանակ նաեւ ասել է. «Մենք կարողացել ենք Հայաստանը դարձնել մարդու համար անհամեմատ ավելի հարմարավետ ու ապահով երկիր: Շատ ավելին պետք է անենք»: Թե որքանով է Ս. Սարգսյանի իշխանությունը Հայաստանը դարձրել հարմարավետ ու ապահով երկիր, վկայում է ԱԺ պատգամավորներ Լեւոն Զուրաբյանի ու Վարդան Օսկանյանի առանձնազրույցի գաղտնալսման ու ձայնագրության հրապարակման փաստը:
Ս. Սարգսյանի ելույթի ուշագրավ հատվածները, սակայն, այսքանով չեն ավարտվում: «Մեր բոլոր քայլերն ուղղված են դեպի մարդը: Դեպի հայաստանցին: Մեր բոլոր ջանքերը մարդու համար են, մեր հայրենակիցների, նրանց բարօրության համար: …Այս ամենով հանդերձ, ապահով Հայաստանի կարեւորագույն հիմքը ապահովված ընտանիքներն են»,-ասել է նա: Սա, թերեւս, կարելի է համարել Ս. Սարգսյանի ելույթի ամենամեծ սուտը: Միգրացիոն ծառայության պաշտոնական վիճակագրության համաձայն՝ վերջին 11 ամսում երկրից մեկնել ու չի վերադարձել 71 հազար 374 մարդ: Ինչ վերաբերում է ապահովված ընտանիքների մասին Ս. Սարգսյանի հայտարարությանը, ապա դա եւս հեքիաթների ժանրից է: ԱՎԾ-ի՝ «Հայաստանի սոցիալական պատկերը եւ աղքատությունը 2012թ.» վերնագրով զեկույցի մեջ ասված է. ՀՀ-ում աղքատության ցուցանիշը կազմում է 35 տոկոս (ի դեպ, 2008թ., մինչեւ Ս. Սարգսյանի պաշտոնավարումը, աղքատության ցուցանիշը կազմել է մոտ 17 տոկոս): Ավելին, այս ընթացքում ավելացել է ծայրահեղ աղքատների թիվը, 2011թ.-ին՝ մոտ 23 հազարով:
«Ճգնաժամի պայմաններում մենք կարողացանք զսպել էլեկտրաէներգիայի, գազի ու ջրի սակագների աճը»,-սա էլ Ս. Սարգսյանի հերթական սուտը: Պարզվում է՝ այս ընթացքում գազի սակագինը աճել է. ըստ ՀՀ ՊԵԿ տվյալների՝ 2012թ. երրորդ եռամսյակում ՌԴ-ից ՀՀ ներմուծվել է մոտ 304.6 միլիոն խորանարդ մետր բնական գազ, որի մաքսային արժեքը կազմել է ավելի քան 74.4 միլիոն ԱՄՆ դոլար: Եթե նշված գինը բաժանում ենք ներմուծված գազի ծավալի վրա, ապա ստացվում է, որ հազար խորանարդ մետր բնական գազը 2012-ի հուլիս-օգոստոս-սեպտեմբեր ամիսներին ՀՀ-ն ՌԴ-ից ներմուծել է ավելի քան 244 ԱՄՆ դոլարով՝ նախկին 220-ի փոխարեն: Իսկ սակագնի բարձրացումը ՀՀ քաղաքացիներն իրենց մաշկի վրա չեն զգացել, որովհետեւ «Հայռուսգազարդ»-ի Հայաստանի բաժնեմասը, որն ընդհանուր սեփականության 20%-ն է, կառավարության որոշմամբ վաճառվել է ՌԴ-ին 63 մլրդ դրամով:
Հակասությունների այս շարքը կարելի է դեռ երկար թվարկել: Սակայն սրանք բավարար են՝ հասկանալու համար պարզ ճշմարտությունը. Ս.Սարգսյանը պարզապես խաբում է ժողովրդին: Ու խաբում՝ անամոթաբար:
.gif)
