ՇՈՒՐԱ, ՄԻԱՅՆ ԽԱՐԴԱԽՈՒԹՅՈՒՆ

Երեւանի  Կենտրոն եւ  Նորք-Մարաշ  վարչական շրջանների ընդհանուր իրավասության դատարանը Գագիկ Ավետիսյանի նախագահությամբ,   2010թ. օգոստոսի 13-ին 1976 թվականին ծնված  Արմեն  Հակոբյանին   մեղավոր ճանաչելով Քրեական օրենսգրքի 178-րդ հոդվածի 3-րդ մասի 3-րդ կետով, դատապարտեց նրան ազատազրկման վեց տարի ժամկետով: Սա միջնակարգ կրթությամբ, ամուսնացած, ծագումով ղարաբաղցի Արմեն Հակոբյանի 8-րդ ազատազրկումն էր: Նա դատապարտվել է նախկին, լրամշակված եւ գործող Քրեական օրենսգրքի գրեթե բոլոր հոդվածներով ու  կետերով`  կողուպուտ, գողություն, խարդախություն, գրեթե բոլոր շրջանների ու մարզերի դատարանների կողմից` Սյունիքից մինչեւ… Կոտայքի մարզի ընդհանուր իրավասության դատարան, որը 2009թ. դեկտեմբերի 28-ի դատավճռով` նրան դատապարտել էր էլի 177-րդ հոդվածի 3-րդ մասի 3-րդ կետով` ազատազրկման ութ տարի ինը ամիս 25 օր ժամկետով: «Նուբարաշենում» իր վերջին  ազատազրկման պատիժը կրելու ընթացում նրա մոտ թարմ գաղափարներ  են հղանում. որոշում  է «Օդնակլասնիկ» կայքի միջոցով  ծանոթանալ զանազան կանանց հետ, նրանց ներկայանալ որպես Մեղրիում բնակվող ֆրանսահայ գործարար եւ խոստանալ  ամուսնանալ: Այս խոստումները տրվում են ոչ միայն կայքով, այլեւ բջջային հեռախոսի ամեն կնոջ համար նախատեսված համարներով` 094006320, 077771244, 098771244:  Հիմնական սցենարը. պատրվակով,  որ Մեղրիում  «Ղ-տելեկոմի» լիցքավորման քարտեր չեն վաճառվում, խնդրում է լիցքավորել իր հեռախոսները կամ տարբեր մարդկանց միջոցով իրեն կանխիկ փող, ոսկյա զարդեր ու կենցաղային իրեր փոխանցել: Մի քանի անգամ սա կատարվել է «Նինվե» տաքսի ծառայության վարորդ Ռոման Դավթյանի միջոցով: Արմեն Հակոբյանը Լիլիթ  Ղազարյանից` 240.000, Կարինե Ղազարյանից` ոսկյա ականջօղեր, խաչով ոսկյա շղթա եւ  45.000  դրամ, Գայանե Պողոսյանից` 31.000, Ալվինա Մնացականյանից` 65.000,  Մարիամ  Մնացականյանից` 296.500 դրամ եւ  բջջային հեռախոս. Մարինե Հայրապետյանից` 32.000, Անուշ  Վարդանյանից` 50.000 դրամ է ստացել: Ամենաշատը  տուժած Լիլիթ Ղազարյանի նախաքննական եւ դատաքննական ցուցմունքով  Արմենին մոր` Ռուզաննա Ղազարյանի միջոցով փոխանցել է 20.000 ՀՀ դրամ կանխիկ գումար ոմն Գրիշայի միջոցով, ապա որոշ ժամանակ անց կրկին Ա.Հակոբյանի խնդրանքով` 42.000  դրամ, իսկ  2009թ. դեկտեմբերի  14-ին 84.000: Վերջին անգամ Արմենը նրան զանգահարել է 094 006320 հեռախոսահամարով, հարցրել,  թե որքան է պարտք ու անհետացել:Իսկ Կարինե Ղազարյանը 2009թ. դեկտեմբերի 13-ին «Օդնակլասնիկի» կայքով  Արմենի հետ ծանոթանալուց չորս օր հետո, նրա կողմից ուղարկված Ռոման Դավթյանին  Հանրապետության հրապարակում հանձնել է իր ոսկյա զարդերը եւ 42.000 դրամով լիցքավորել հեռախոսը: Միայն տուժող Լիլիթ Ղազարյանին է  խաբել այլ սցենարով. 2009թ. դեկտեմբերի 9-ին Արմենը զանգահարել է նրան եւ սփյուռքահայի բարբառով խոսելով` նշել, որ մաքսատան հետ կապված խնդիրներ ունի: Ապա խնդրել է օգնել 20.000  դրամով` պատճառաբանելով, որ իր ապրանքները բաց չեն թողնում մաքսատնից` այդ գումարի մուծված չլինելու պատճառով: Գումարը փոխանցվել է «Կենտրոն» թաղապետարանի մոտ, ոմն  Գրիշայի միջոցով:Արմեն Հակոբյանն իրեն մեղավոր է ճանաչել առաջադրված մեղադրանքներում:ԱՆՈՒՇ ԴԱՇՏԵՆՑ