Վերջին շրջանում «Սթար» սուպերմարկետների ցանցի հետ կապված «Ժողովուրդ»-ը բազում դժգոհություններ է ստանում: Ինչո՞ւ են փակվում «Սթար»-ի խանութները: Այս եւ ընկերությանն առնչվող այլ հարցերի շուրջ զրուցեցինք «Սթար» առեւտրային ցանցի գործադիր տնօրեն Տեոդորա Տիչերիչիի հետ:
-«Սթար» առեւտրային ցանցը վերջերս գտնվում է հանրության ուշադրության կենտրոնում: Ի՞նչ փուլում է այս պահին կազմակերպության գործունեության ընթացքը:
-Ընկերությունը վերակառուցման փուլում է: Մենք փոխել ենք ներքին կառուցվածքը, որպեսզի այն համապատասխանեցնենք մեր բիզնեսի պահանջներին: Փոփոխության են ենթարկվել նաեւ ներքին ռազմավարության որոշ առանձնահատկություններ: Ինչպես գիտեք, «Սթար»-ը գործում է 2005 թվականից, այդ պահից սկսած` փոխվել է նաեւ շուկան, եւ հաջողության հասնելու համար ընկերությունները պետք է պատրաստ լինեն շուկայի փոփոխություններին:
-Վերջերս ականատես ենք լինում «Սթար»-ի որոշ խանութների փակմանը: Արդյո՞ք դա կազմակերպության ռազմավարության մի մասն է:
-Այո՛, վերջին շրջանում փոքր ֆորմատի չորս խանութ ենք փակել: Դրանք այն խանութներն էին, որոնց տարածքի վարձավճարը բավական բարձր էր, ինչը սննդի մանրածախ առեւտրի բիզնեսը, որն ունի փոքր խանութներ, չի կարող արդարացնել, կամ դրանք պարզապես շատ թանկ էին այդ տարածքի համար: Ինչպես արդեն նշեցի, վերջին մի քանի տարիների ընթացքում շուկան հսկայական փոփոխությունների է ենթարկվել: Սննդի մանրածախ առեւտրի ոլորտը շատ պարզ է, երբ նայում ես թվերին, այլ կերպ ասած՝ մենք հստակ գիտենք, թե որքան կարող ենք վճարել տարածքի վարձակալության համար: Մենք մտադիր ենք գտնել ավելի եկամտաբեր տարածքներ` կոմպենսացնելու համար մեր ներկայությունը դաշտում:
-Վերջին ժամանակներում գնորդներից շատերը դժգոհում են, թե կարող են ժամերով խանութների ներսում աշխատակից փնտրել, բայց չգտնել: Խանութում աշխատողների սակավաթիվ լինելը պայմանավորված է անցումային փուլում գտնվելու հե՞տ, թե՞ նոր ձեւավորվող աշխատաոճի հետեւանք է:
-Սուպերմարկետում կարեւոր է ունենալ գանձապահ եւ մսավաճառ, որոնք պետք է միշտ լինեն առեւտրային սրահում, ինչն ապահովում ենք մեր խանութներում: Ինչպես գիտեք, սուպերմարկետների աշխատանքը հիմնված է ինքնասպասարկման վրա: Սա նշանակում է, որ ընդամենը մի քանի ապրանք պետք է ունենա անմիջական վաճառք. դրանք են` միսը, ձուկը եւ երբեմն էլ` տնտեսական կատեգորիայի որոշ ապրանքներ: Այս գաղափարն ընդունված է ամբողջ աշխարհում, քանի որ այսօրվա հաճախորդը խելացի է եւ հստակ գիտի, թե ինչ է ցանկանում: Բացի այդ, հաճախորդները սովորաբար սահմանափակ ժամանակ ունեն գնումներ կատարելու համար: Ճիշտ է, նախկինի համեմատ այժմ մենք ավելի քիչ աշխատակից ունենք, բայց ես վստահ եմ՝ այն, որ գնումներ կատարելիս հաճախորդին անհրաժեշտ է անմիջական կոնտակտ ունենալ աշխատակցի հետ, կարծրատիպի հարց է, ինչի արդյունքում Հայաստանի մանրածախ առեւտրի շուկան, որպես կանոն, ավելի շատ աշխատողներ ունի, քան իրականում պահանջվում է այս ոլորտում: Սա հայաստանյան շուկայում կիրառելը մարտահրավեր է, քանի որ այն ենթադրում է հաճախորդի մտածելակերպի փոփոխություն, ինչպես նաեւ մատակարարման շղթայի ավելի լավ կառույցի ստեղծում:
-Հայտնի է, որ շատ ապրանքատեսակների վրա հայերեն մակնշումներ չկան: Դուք ի՞նչ քայլեր եք անում՝ բացառելու նման ապրանքատեսակների վաճառքը:
-Ստուգման առաջին փուլն ապրանքի ստացման պահն է: Այլ հատկանիշների հետ մեկտեղ մենք (լոգիստիկայի եւ գործառնությունների բաժինները) վերահսկում ենք ապրանքի թարմությունը: Վերոհիշյալ բաժինները պատասխանատվություն են կրում եւ իրավունք ունեն չընդունել ապրանքը, եթե այն չի համապատասխանում որակի պահանջներին` համապատասխան ՀՀ օրենսդրության. սա ներառում է նաեւ հայերեն մակնշումը: Տեղական լեզվով ապրանքի նկարագրություն ունենալը ժամանակատար է: Նույնիսկ եթե սահմանված է օրենքով, հաճախ այն չի արվում, քանի դեռ մանրածախ առեւտրով զբաղվող ընկերությունը չի պահանջում դրա առկայությունը: Անհամապատասխան ապրանք վաճառելը բերում է նրան, որ հաճախորդների մոտ առաջանում են հարցեր, դժգոհություններ, վստահության կորուստ, իսկ ընկերության համար՝ լրացուցիչ աշխատանք: Բայց փորձը ցույց է տալիս, որ հայերեն մակնշում ունենալը լուծվող խնդիր է, եւ համոզված եմ, որ այն մոտ ապագայում կդառնա չափանիշ հայաստանյան շուկայի համար:
Շարունակելով թեման՝ նշեմ, որ ապրանքները ստանալուց եւ դարակաշարի վրա դասավորելուց հետո խանութի անձնակազմը հետեւում է դրանց պահպանման ժամկետներին: Մենք վերադարձնում ենք մատակարարներին ժամկետը լրանալուն մոտ ապրանքը, քանի որ նրանք գիտակցում են իրենց մասնակցության կարեւորությունն այս շղթայում. ժամկետանց ապրանքը վնասում է ոչ միայն ապրանքանիշը եւ վաճառող ընկերությանը, այլեւ հաճախորդի առողջությանը, որն ամենակարեւորն է: Ամեն դեպքում, ոչ բոլոր մատակարարներն են դեռ պատրաստ նման քայլ կատարելու: Սակայն մենք հասնում ենք դրան: Սա եւս համաշխարհային մանրածախ առեւտրի ոլորտում ընդունված չափանիշ է:
-Մի շարք արտադրող ու ներկրող ընկերություններ դժգոհում էին, որ «Սթար»-ն իրենց բավական մեծ թվով գումարներ է պարտք: Ի՞նչ միջոցներ են ձեռնարկվում այս հարցի լուծման ուղղությամբ:
-Այո՛, «Սթար»-ի պարտավորություններն այսօրվա մեր իրականությունն է, որը գալիս է անցյալից եւ իր գագաթնակետին է հասել այս ձմռանը: Ես կցանկանայի ընդգծել, որ ներկայիս բաժնետերը 2011թ. գնել է այս ընկերությունն արդեն իսկ պարտքերով եւ շատ աշխատանք է տարել այն կարգավորելու համար: Այժմ մենք կարգավորում ենք մեր ժամկետանց պարտավորությունները, միեւնույն ժամանակ կոմերցիոն բաժինը վերաբանակցություններ է վարում կոմերցիոն հարցերի շուրջ: Շատ կարեւոր է յուրաքանչյուր մատակարարի հետ հետագա համագործակցությունը, քանի որ առանց դրա բարդանում է պարտավորությունների իրականացման հնարավորությունը: Մեր գործընկերներից շատերն ըմբռնումով են մոտենում, եւ գործընթացն առաջ է գնում:
-Ի՞նչ արդյունքների եք ձգտում հասնել այս տարվա ընթացքում:
-Այս տարի «Սթար»-ի համար շատ դժվար է լինելու: Մենք պետք է հասնենք արդյունքների, որոնք իրենց մեջ ներառում են այն բոլոր փոփոխություններին հասնելը, որ ձեռնարկել ենք անցած աշնանը: Առեւտրային ոլորտում գործունեության հնարավորություն ունեն թե՛ «Սթար»-ը եւ թե՛ նրա խանութները: Հնարավոր է՝ ոչ բոլոր խանութները, բայց այն, որ այս բրենդն իր դիրքն ունի Հայաստանում, միանշանակ է: Մյուս կողմից, իրականում շատ կարեւոր է պահպանել շուկայական մրցակցությունը եւ հաճախորդներին առաջարկել ավելի մեծ ընտրության հնարավորություն: Դա նշանակում է, որ կարող ենք փոխել մեր տեսականին, որպեսզի մեր խանութներն ավելի գրավիչ լինեն: Մեր նպատակը 2013-2014թթ. համար հետեւյալն է՝ ստեղծել կայուն եւ վստահելի բիզնես մեր բաժնետերերի համար: Ինչ վերաբերում է հայաստանյան շուկայի նկատմամբ իմ ունեցած տեսլականին, այն հետեւյալն է՝ շուկան պետք է քայլեր ձեռնարկի՝ մոտենալու համաշխարհային չափանիշներին: Մերօրյա հաճախորդը շատ խելացի է, եւ մենք՝ որպես մանրածախ առեւտրով զբաղվող ընկերություն, պետք է արժանանանք նրա վստահությանը: Դա միանշանակ է:
.gif)
