Ինչպես հայտնի է՝ «Էրեբունի-Երևան 2797» միջոցառումների ծրագիրն ամբողջությամբ պատրաստ է: Իսկ ահա Արցախի մայրաքաղաք Ստեփանակերտում միջոցառումները չեն կայանալու: Այս առիթով տարբեր կարծիքներ են հնչեցվել, շատերն, անգամ, քննադատական կարծիքներ են հայտնել Տարոն Մարգարյանի հասցեին՝ հայտարարելով, որ սահմանային լարվածության այս օրերին միջոցառումները պետք է հետաձգվեին:
Այս առիթով երգչուհի Քրիստինե Պեպելյանը հայտարարել է, որ ինքը պատրաստ է միջոցառումներից ստացված իր ողջ հասույթը կրկնապատկել և ամբողջությամբ տրամադրել սահմանամերձ գյուղերին՝ գոնե որոշակի չափով օգնելու նպատակով. «Էրեբունի-Երևան» տոնակատարություններից գոյացած ողջ հոնորարս կփոխանցեմ Բաղանիսի գյուղապետարան: Ես՝ որպես հայ մարդ, որպես երգչուհի ու որպես «Էրեբունի-Երևան» տոնակատարությունների մասնակից չկարողացա անմասն մնալ արդեն քանի օր համացանցում քննարկվող թեմայից: Իմ կարծիքով՝ Երևանի քաղաքապետարանից ինչ-որ բան պահանջելը այնքան էլ ճիշտ չէ, քանի որ նման միջոցառումների հետ կապված աշխատանքներն իրականացվում են ամիսներ առաջ ու ահռելի աշխատանք է արվում նախապատրաստական աշխատանքների համար:
Իհարկե, ես, ինչպես յուրաքանչյուր հայ մարդ, նույնպես խոր ցավով եմ տեղեկանում սահմանին տիրող իրավիճակի մասին: Խոնարհվում եմ հայրենիքիս պաշտպանների առջև, խոնարհվում եմ նաև մեզ իրենց կյանքի գնով պաշտպանած հերոսների շիրիմների առջև, իսկ հայ զինվորիս մայրերին ուժ ու կորով եմ մաղթում: Ինչպես շատ երաժիշտներ, ես նույնպես մեկ ամիս առաջ եմ իմ համաձայնությունը տվել՝ Երևանի տոնին մասնակցելու համար: Ես այս պահից պաշտոնապես հայտարարում եմ. Համերգի իմ ողջ հոնորարը ես կկրկնապատկեմ (իմ միջոցներով) և կփոխանցեմ Բաղանիսի գյուղապետարան՝ ինչ որ չափով փարատելու մեր սահմանամերձ գյուղի բնակիչների հոգսերը: Կոչ եմ անում բոլոր գործընկերներիս նմանօրինակ նախաձեռնությամբ հանդես գալ. Դուք այսպես և՛ չեք «վիրավորի» ձեր մայրաքաղաքին, և՛ ինչ որ չափով կօգնեք մեր սահմանամերձ բնակիչներին»,- հավելել է երգչուհին:
.gif)
