Մարտի 25-ին Լեռնային Ղարաբաղի Հանրապետության արտաքին գործերի նախարար Կարեն Միրզոյանն ընդունել է ճանաչողական այցով Ստեփանակերտ ժամանած Հունգարիայի Պիտեր Պազմանի անվան Կաթոլիկ համալսարանի ուսանողներին և դասախոսներին։
Ողջունելով հյուրերին, արտաքին գործերի նախարարը նշել է, որ հունգարական համալսարանի ուսանողների այցերը, որոնք արդեն դարձել են ավանդական, ոչ միայն թույլ կտան նրանց ավելի ճշգրիտ և ամբողջական կարծիք կազմել Արցախի մասին, այլև կապեր հաստատել Արցախի համալսարանական շրջանակների ներկայացուցիչների հետ:
Հանդիպման ընթացքում Կարեն Միրզոյանը ներկայացրել է ԼՂՀ արտաքին քաղաքականության հիմնական ուղղությունները, անդրադարձել ԼՂՀ միջազգային ճանաչման գործընթացին, ընդգծելով, որ այդ ուղղությամբ ձեռքբերված հաջողությունները նպաստում են ԼՂՀ միջազգային ինտեգրմանը և տարբեր ոլորտներում համագործակցության զարգացմանն ու ամրապնդմանը։
ԼՂՀ ԱԳՆ ղեկավարը պատասխանել է նաև մասնակիցների հարցերին։ Խոսելով ադրբեջանա-ղարաբաղյան հակամարտության խաղաղ կարգավորման գործընթացի մասին, Կարեն Միրզոյանը նշել է, որ իրական առաջընթացի բացակայության պատճառն ադրբեջանական իշխանությունների ապակառուցողական քաղաքականությունն է՝ ուղղված բոլոր միջոցներով բանակցային գործընթացի խաթարմանը։
.gif)
