Հարց քաղաքացիներից` ի՞նչ փաստաթղթեր են ներկայացվում հանրակրթական դպրոց ընդունվելու համար

ՀԱՐՑ. Ի՞նչ փաստաթղթեր են ներկայացվում հանրակրթական դպրոց ընդունվելու համար:

Մարինե Աբրահամյան, 29 տարեկան, վաճառող

ՊԱՏԱՍԽԱՆ. Հանրակրթական դպրոց ընդունվելու համար երեխայի ծնողը (նրա օրինական ներկայացուցիչը) դպրոց է ներկայացնում`

ա) դիմում,

բ) 2 լուսանկար,

գ) երեխայի ծննդյան վկայականի պատճենը,

դ) տեղեկանք երեխայի առողջության մասին (սպասարկող բուժհիմնարկից),

ե) դպրոցից դպրոց աշակերտի փոխադրման թերթիկը` հաստատված տվյալ դպրոցի տնօրենի կողմից (առաջինից բարձր դասարաններ ընդունվելու համար),

զ) աշակերտի անձնական գործը` հաստատված տվյալ դպրոցի տնօրենի կողմից (առաջինից բարձր դասարաններ ընդունվելու համար):

ՀՀ կրթության եւ գիտության նախարարության լրատվության եւ հասարակայնության հետ կապերի վարչություն

«ԺՈՂՈՎՈՒՐԴ». Եթե առաջին դասարանցիների թիվը շարունակի տարեցտարի նվազել, ապա շատ չանցած` դպրոցները մասնավոր բուհերի կարգավիճակում կհայտնվեն եւ աշակերտ հավաքագրելու նկատառումներով գովազդ կտարածեն: Պաշտոնական եւ հատկապես մասնավոր դիտարկումները վկայում են, որ ամեն տարի դիմորդների թվի խայտառակ անկում է արձանագրվում:

Թեեւ սովորաբար լսում ենք սփյուռքի դպրոցների փակման մասին, սակայն ներկա գործընթացները անխուսափելի են դարձնելու  նաեւ  տեղական կրթօջախների փակումը:  Առանց այն էլ, եթե 10-20 տարվա կտրվածքով աշակերտների թիվը համեմատում ենք, ապա  թվերն այնպիսի սարսափազդու պատկեր են ներկայացնում, որ դպրոցների մի ստվար մասն արդեն իսկ կարելի է փակված համարել: Եվ բնական է, որ եթե երկրի երկրորդ դեմքը խրախուսում է արտագաղթը, ապա առավել վատթար ժամանակները առջեւում են: