Հերթական ծաղրն օրինապաշտ հարկատուների նկատմամբ. ՀՀ էներգետիկ համակարգը «խժռած» «Գազպրոմին» նոր պարտքի գոյացումը տարակուսելի է. խմբագրական

Նախօրեին ռուսական «Լայֆ» պարբերականը տեղեկատվություն հրապարակեց այն մասին, որ ՀՀ կառավարության սեփականությունը հանդիսացող «Երեւանի ՋԷԿ»-ը ռուսական «Գազպրոմին» պարտք է 52,3 միլիոն դոլար: Վերջին տարիներին ՀՀ էներգետիկ համակարգը «խժռած» «Գազպրոմին» այս նոր պարտքի գոյացումը, մեղմ ասած, տարակուսելի է, քանի որ ընդամենը 2013թ-ի դեկտեմբերին կնքված խայտառակ գազային պայմանագրով հայկական կողմը մինչ օրս չպարզաբանված հանգամանքներում գոյացած 300 մլ դոլար պարտքի դիմաց ռուսական ընկերությանը փոխանցեց ՀՀ ունեցած վերջին՝ 20% բաժնեմասը «Հայռուսգազարդում», որից հետո այլեւս 100 տոկոսով ՌԴ-ի սեփականություն հանդիսացող ընկերությունն անվանափոխվեց «Գազպրոմ Արմենիա»: Եւ, ահա, հիմա եւս 52,3 միլիոնանոց պարտքի գոյացման մասին տեղեկատվությունը ուղղակի արդեն ծաղրի է նմանվում մեր բոլորիս՝ ՀՀ օրինապաշտ հարկատուներիս նկատմամբ:

Երեկ «Ազատության» հարցերին ի պատասխան, թե որտեղից, ինչպես է գոյացել այդ պարտքը, ՀՀ էներգետիկայի եւ բնական պաշարների նախարար Լեւոն Յոլյանն «աչքալուսանք» է տվել՝ ասելով, թե «Երեւանի ՋԷԿ»-ը այսօրվա դրությամբ «Գազպրոմ Արմենիա»-ին պարտք է ոչ թե 52,3, այլ 33.8 մլ դոլար: Մնացած մոտ 20 մլ դոլարը, ըստ նախարարի, մարվել է Համաշխարհային բանկից վերցված վարկի հաշվին: Ասել է թե՝ մեծ հաշվով ՀՀ մի կառույցից պարտքով գումար է վերցրել մեկ այլ կառույցին ունեցած պարտքը մասնակի մարելու նպատակով: Իսկ «Գազպրոմին» ունեցած պարտքի մնացած մասը, ըստ Յոլյանի, նախատեսված է ամբողջությամբ մարել մինչեւ 2017 թ. օգոստոսի 1-ը:

Պարտքի մարման շուրջ այս խուճուճ բացատրություններին զուգահեռ՝ Յոլյանը հարկ է համարել հայտարարել, որ այդ պարտքը գոյացել է դեռեւս իր պաշտոնավարումից առաջ՝ այդպիսով իրեն դուրս դնելով դրա գոյացման համար պատասխանատվությունից: Թե որքանով է նորմալ, երբ այս կամ այն պաշտոնյան իր ղեկավարած գերատեսչությունում առկա խնդիրները բացատրում է իր ստացած վատ ժառանգությամբ, այլ հարց է: Այստեղ էականն այն է, որ Յոլյանը խոսում է համակարգում առկա լրջագույն թերացման մասին, որի արդյունքում գոյացել է հսկայական՝ 52,3 միլիոն դոլարի պարտք, եւ դա, փաստորեն, տեղի է ունեցել 2014թ-ից մինչեւ 2016 թթ ընկած ժամանակահատվածում: Հարց է առաջանում՝ իսկ ով էր այդ փուլում Էներգետիկայի նախարարը, եւ ինչու ՀՀ դատախազությունը նրան շատ կոնկրետ հարցեր չի ուղղում:

Իսկ ՀՀ էներգետիկ համակարգի պատասխանատուն այդ փուլում ոչ անհայտ Երվանդ Զախարյանն է, որը տարիներ շարունակ տարբեր բարձր պաշտոններ զբաղեցնելուց եւ սկանդալային պատմություններում հայտնվելուց հետո /սկսած «մազութի գործից», ավարտած Երեւանի կենտրոնի այլանդակմամբ, եւ ինչպես պարզվեց՝ էներգետիկ համակարգում ստեղծած խայտառակ վիճակով/ առոք-փառոք գնաց թոշակի՝ վայելելու վաստակած միլիոնները: