ԳԱԶԻ ՓՈԽԱՐԵՆ ԹԱՆԿ ԿՎՃԱՐԵՆՔ ՂԱՐԱԲԱՂԻ ՀԱՄԱՐ

«Իսպանիայի թագավոր, բիզնես, մշակույթ եւ մի քիչ Հայաստանի նախագահ»` ռուսական «Ռեգնում» լրատվական գործակալությունն ահա այսպիսի խոսուն վերնագրով է անդրադարձել Դմիտրի Մեդվեդեւի հետ  ՀՀ նախագահ Սերժ Սարգսյանի ունեցած հանդիպմանը: Ռուսական այս հեղինակավոր լրատվամիջոցը, անդրադառնալով Ռուսաստանի հյուսիսային մայրաքաղաքում Դմիտրի Մեդվեդեւի աշխատանքային  օրվա իրադարձություններին, հսկայական տեղ է հատկացրել Իսպանիայի թագավոր Խուան Կառլոս 1-ինի հետ  վերջինիս ունեցած հանդիպմանը, ընթրիքին, ռուս-իսպանական մշակութային եւ բիզնես համագործակցության  հեռանկարներին, ստորագրված պայմանագրերին եւ այլ միջոցառումներին` արանքում, իմիջիայլոց, թռուցիկ կերպով նշելով, որ  Մեդվեդեւը հասցրել է  նաեւ «ոտքի վրա» փակ ֆորմատով  հանդիպել  ՀՀ նախագահ Սերժ Սարգսյանին, ինչից անմիջապես հետո շտապել է իր բարձրաստիճան հյուրին ուղեկցել«Տավրիչեսկի» պալատ` ունկնդրելու Իսպանիայում պատվիրված նոր, եզակի երգեհոնի համերգը:Ռուսական իշխանական  տրամադրություններն արտացոլող այս կայքի հրապարակմանն այսքան մանրակրկիտ չէինք անդրադառնա, եթե դրա  վերնագիրն ու տոնը մեզ համար այդքան նվաստացուցիչ չինեին:  Եվ դրան հակառակ` այդքան հաղթական ու պաթետիկ չլինեին «հայլուրիկների» պատրաստած ռեպորտաժները:  Իսկ հաղթականության առիթն այն է, որ Սերժ Սարգսյանին հաջողվել է համոզել իր ավագ եղբորը (այս ձեւակերպումն էլ օգտագործում ենք իբրեւ սրտահովանք), որ նա առայժմ չթանկացնի Հայաստան առաքվող գազի սակագինը: Դրա համար, հավանաբար, պարտական ենք արաբական երկրներում տեղի ունեցող հեղափոխություններին, որոնց`  Հայաստան տեղափոխվելու  վտանգն էլ, ըստ ամենայնի, եղել է ռուսներին համոզելու որոշիչ փաստարկը: Ուստի ֆորպոստում կայունությունն ապահովելու նպատակով Ռուսաստանը համաձայնել է 2011թ. ընթացքում անփոփոխ թողնել գազի սակագինը:   Սակայն, ինչպես հաջողվեց ճշտել մեր աղբյուրներից, սա եղել է  Իսպանիայի թագավորի հետ համերգի շտապող Դմիտրի Մեդվեդեւի եւ այդ համերգին չհրավիրված    Ս. Սարգսյանի հանդիպման միակ դրական արդյունքը:   Ուստի, եթե անգամ Սերժ Սարգսյանին հրավիրեին էլ այդ համերգին, վերջինս  հազիվ թե գնար` տրամադրության  կտրուկ անկման պատճառով: Բանն այն է, որ, ըստ մեր աղբյուրների, փակ ֆորմատով կայացած այդ հանդիպման ընթացքում Դմիտրի Մեդվեդեւը Սերժ  Սարգսյանին ոչ երկիմաստ կերպով հասկացրել է, որ վերջինս ստիպված է լինելու առաջիկայում Ղարաբաղի հարցում գնալ լուրջ զիջումների, հակառակ դեպքում ակնարկելով  պատերազմի անխուսափելիության հեռանկարը:  Դ. Մեդվեդեւը Ս. Սարգսյանին նաեւ հիշեցրել է ինչպես նրա նախորդի` Ռ. Քոչարյանի, այնպես էլ վերջինիս  տված խոստումները եւ զգուշացրել, որ դրանցից խուսանավելու  եւ ժամանակ ձգելու հնարավորություններն արդեն մոտեցել են զրոյական նիշին: Ի պատասխան Սերժ Սարգսյանն, ըստ մեր ունեցած տեղեկությունների, նշել է, որ ինքը  պատրաստ է գնալ կառուցողական քայլերի` ընդհուպ մինչեւ որոշակի տարածքային զիջումներ, եթե Ադրբեջանը եւս կատարի առնվազն ոչ պակաս ադեկվատ քայլեր:  Ամեն դեպքում Սերժ Սարգսյանին հասկացրել են, որ նա ժամանակ ունի մտածելու մինչեւ մարտի 5-ը: Հանդիպման ընթացքում, մեր տեղեկությունների համաձայն,  Մեդվեդեւը նաեւ պահանջել է, որ Սերժ Սարգսյանը վերանայի իր կադրային քաղաքականությունը` երկրի համար կարեւորագույն պաշտոններում նշանակելով բացարձակ ռուսամետ  եւ իրենց կողմից վերահսկվող կադրերի: Եվ եթե Ղարաբաղի հարցում Ս. Սարգսյանին, այնուամենայնիվ, հաջողվել է խուսափողական պատասխան տալով եւս մի կարճ ժամանակ շահել, ապա  ֆորպոստի ներքաղաքական  իրավիճակի հետ կապված հարցերում նա ստիպված է եղել  շատ կոնկրետ խոստումներ տալ: Այնպես որ չի բացառվում, որ արդեն առաջիկա օրերին  ականատես դառնանք որոշակի  կադրային փոփոխությունների: ԹԱԳՈՒՀԻ ԹՈՎՄԱՍՅԱՆ