ՊԱՀԱՆՋՈՒՄ ԵՆ ՎՃԱՐԵԼ ՎՃԱՐԱԾԻ ՀԱՄԱՐ

Հայ հեռուստադիտողները վաղուց էկրաններին չէին տեսել բողոքող մի ողջ գյուղ, գյուղացիական ընդվզում, նրանց առաջնորդող գյուղապետ եւ հարցին տեղում ու արագ արձագանքող մարզպետ: Ի՞նչն էր զայրացրել մարդկանց:Արարատի մարզի Դաշտավան գյուղի բնակիչներին զայրացնողը Մասիսի «Ջրմուղկոյուղուց» ուղարկված զգուշացումներն ու դատարանի թղթերն էին`  խմելու ջրի իբր չվճարված պարտքերի մասին: Հանուն «արդարության ու հավասարության» ոչ մեկին չէին մոռացել, բոլորին էլ պարտքի հսկայական թվեր էին ուղարկել` չվճարման դեպքում սպառնալով դատարանով: Պարտքի չափն էլ հայ գյուղացու գրպանի համար աստղաբաշխական է` 250- 280 հազար դրամ: Ծանուցման մեջ նշված է, որ   գյուղացիները «Ջրմուղկոյուղուն» պարտք են դեռեւս  2002 թվականից: Մինչդեռ դաշտավանցիները վստահեցնում են, որ իրենք տարիներ շարունակ յուրաքանչյուր ամիս օգտագործված ջրի համար  ֆիքսված գումար են մուծել, որոնց կտրոններն էլ պահպանել են: Բացի այդ, նրանք հիշեցնում են, որ 2002թ. գյուղում դեռեւս ջրաչափեր տեղադրված չէին: Ուրեմն` որտեղի՞ց հայտնվեցին հարյուր հազարների պարտքերը: Դատական թղթերի ծանր ծրարները սկսեցին գալ այն ժամանակվանից,  երբ «Ջրմուղկոյուղին» վաճառվեց  ֆրանսիական ընկերությանը: Ամեն ամիս ջրաչափի գումարը պարտաճանաչ մուծող մարդկանց համար այդ ծրարները սառը ցնցուղի ազդեցություն էին թողնում: Եվ չկար մեկը, որը պաշտպաներ նրանց իրավունքները: Ուստի իրենց ձայնը լսելի դարձնելու համար դաշտավանցիներն իրենց գյուղապետի առաջնորդությամբ  գյուղովի միավորվեցին` մտադրվելով դիմել բողոքի  ծայրահեղ ակցիաների:Դաշտավանի գյուղապետ Սերյոժա Խաչատրյանը  «Ժողովուրդ»-ի հետ զրույցում նշեց. « Մերը բողոք չէ, ժողովրդի պահանջն է: Խմելու ջրի նախկին պարտքերի համար ենք   բողոքում: Առայժմ բանը չհասավ ճանապարհ փակելուն, ամեն ինչ բարեհաջող անցավ: Մարզպետը եկավ, մարդկանց լսեց ու ասեց` չանհանգստանան, փող չտան, մինչեւ ինքը հարցով հետաքրքրվի: Սակայն առայժմ ոչ ոք  ջրի պարտքերը զիջելու մասին մեզ ոչինչ  չի խոստացել»:   Մենք փորձեցինք խնդրի մասին մեկնաբանություններ ստանալ նաեւ Արարատի մարզպետ Էդիկ Բարսեղյանից: «Ժողովուրդ»-ի հետ հեռախոսազրույցում պարոն Բարսեղյանը  վստահեցրեց, որ ինքը  բնակչության կողքին կանգնած է: Անդրադառնալով ստացվող ծանուցումների  օրինականությանը` մարզպետը նշեց. «Թեեւ ոչ համատարած, սակայն բազմաթիվ գյուղերում են նման դատական թղթեր ստանում: Այդ գումարների հարցը քննարկվում է: Տեսակետ կա, որ կազմակերպության մասնավորեցումից առաջ` 2002 թվականից գոյացած պարտքերը ներկայիս կառավարիչներն  իրավունք չունեն գանձելու: Հույս ունենք հարցն  ի նպաստ գյուղացիների լուծել: Պատրիկ Լորենը Փարիզում է, կգա, հարցը կքննարկենք»,-վստահեցրեց   մարզպետը:Սա Դաշտավանը, իսկ մարզի  մնացած 97 համայնքնե՞րը: Էդիկ Բարսեղյանի խոսքերով` բոլոր համայնքների ղեկավարներն էլ  զգուշացված են:ԳԱՅԱՆԵ ՄԿՐՏՉՅԱՆ