Հարցազրույց ՀԱԿ անդամ, նախկին քաղբանտարկյալ, ԵԿՄ Շիրակի մարզային վարչության նախկին ղեկավար, ՀՀ ռազմական ոստիկանության Շիրակի կայազորի նախկին պետ Աշոտ Զաքարյանի հետ:- Պարո՛ն Զաքարյան, Աշոտ Մանուչարյանը եւ Ժիրայր Սէֆիլյանը, որոնք համարվում էին ՀԱԿ համակիրներ, երեկ մասնակցել են Տիգրան Կարապետյանի կազմակերպած հանրահավաքին: Ձեր կարծիքով ինչո՞ւ:- Անկեղծ ասած տեղյակ չեմ, որ ներկա են գտնվել, հետեւաբար դժվարանում եմ մեկնաբանություններ տալ: – Ձեր կարծիքով այսօր ՀԱԿ-ն ի՞նչ պիտի ասի ՀՀ քաղաքացիներին, որպեսզի բավարարի նրանց ցանկությունները:- Կարծում եմ` շեշտադրումներն են փոխվել, եւ այսօրվա հանրահավաքը նոր փուլի սկիզբ է: Փուլ, որ տանելու է վերջնական հաղթանակի եւ սահմանադրական կարգի վերականգնմանը: -Տեւական հանրահավաքներո՞վ եք պատկերացնում հաղթանակը, թե՞ այլ մարտավարություն է անհրաժեշտ: – Ես կարծում եմ, որ տեւական հանրահավաքների արդյունքում իշխանությունը ստիպված կլինի հրաժարական տալ, ինչի պատճառով Հայաստանում կանցկացվեն արտահերթ ընտրություններ, ընդ որում առաջին հերթին նախագահական ընտրություններ, որի արդյունքում մենք կունենանք օրինական ընտրությունների ճանապարհով ձեւավորված իշխանություն: Սա նշանակում է սահմանադրական կարգի վերականգնում:- Որպես ՀԱԿ անդամ` Դուք արդեն տեղյա՞կ եք գործողությունների ծրագրին. այսինքն` այսօրվանի՞ց կսկսվի հանրահավաքային պայքարը, թե՞ նոր պիտի հայտարարվի մեկնարկի մասին:- Ես կարծում եմ, որ մեր այսօրվա հանրահավաքը հենց մեր գործողությունների մեկնարկն է: Թե ինչ հաճախականությամբ տեղի կունենան հերթական հանրահավաքները, դժվարանում եմ ասել:- ՀԱԿ ներկայացուցիչներից եղել են մարդիկ, որոնք ՀԱԿ-ին մեղադրել են անվճռականության, անգործության մեջ. Կարապետ Ռուբինյան, Ալեքսանդր Արզումանյան եւ այդպես շարունակ:- Անկեղծ ասած ես չեմ կարող կիսել նման մեղադրանքները: Համենայնդեպս, հաշվի առնելով մեր իրողությունները` այդ թվում եւ միջազգային հարաբերությունները` կյանքը ցույց տվեց, որ ՀԱԿ-ի մարտավարությունը ճիշտ էր, ինչքան էլ որ մեղադրանքներ կան ոչ վճռական գործողությունների եւ այլնի մասով: Մյուս կողմից իրողություն է այն, որ ՀԱԿ-ը բազմաշերտ կառույց է, որտեղ հավաքված են տարբեր գաղափարախոսությունների տեր մարդիկ, որոնց միավորել է մեկ նպատակ, այն է` սահմանադրական կարգի վերականգնումը: Պետք չէ խանդով, ցավով ընդունել այդ թվում եւ Արզումանյանի եւ Ռուբինյանի ասածները: – Նշվում է, որ ՀԱԿ-ի ներսում ժողովրդավարության պակաս կա:- Այն, որ Ռուբինյանը, Արզումանյանը այդպես են խոսում, այն, որ Սէֆիլյանը մասնակցել է Կարապետիչի հանրահավաքին, խոսում է այն մասին, որ ՀԱԿ-ի ներսում ժողովրդավարության պակաս չկա: Դա լավագույն ապացույցն է:- Գյումրիում վերջին շրջանում շատ ակտիվ էին վարորդները, ինչո՞ւ ՀԱԿ-ը չէր փորձում ուղղորդել բողոքի ակցիան, որ «Ժառանգություն»-ն էր անում:- Ուղղորդել ձեւակերպումը երեւի այդքան էլ տեղին չէ: ՀԱԿ-ը իմ դեմքով մշտապես մասնակցել է վարորդների կողմից կազմակերպված միջոցառումներին, ավելին, մենք ունեցել ենք բազմաթիվ հանդիպումներ, քննարկումներ, պարզապես վարորդներն իրենք էին խնդրում, որպեսզի հարցը չքաղաքականացվի: Սա էր պատճառը, որ մենք ակտիվ չառաջնորդեցինք նրանց:- Որպես նախկին ռազմական ոստիկանապետ` այսօրվա «քաղաքացիական ոստիկանների» գործունեությանը ի՞նչ գնահատական կտաք` հատկապես երիտասարդ ակտիվիստներին առեւանգելու մասով:- Ես ավելի քան վստահ եմ, որ ոստիկանությունը որեւէ արդյունքի չի հասնելու: Ոչ մի բռնություն չի կարող կասեցնել այն շարժումը, ինչը սկիզբ է առել դեռեւս 2008-ին: Այդ երիտասարդները բառիս ամենաիսկական իմաստով քաղաքացիներ են, ոչ մի ահաբեկչություն շարժումը չի կարող կասեցնել: – Այսօրվա հանրահավաքի մասնակիցներին ի՞նչ կոչ կանեք:- Լինել վճռական, համարձակ, միասնական, հավատալ ՀԱԿ առաջնորդին, վստահել եւ հավատալ, որ ՀԱԿ-ը համաժողովրդական շարժման շնորհիվ մեր պայքարը հասցնելու է իր վերջնական հանգրվանին: Թ. ԹՈՎՄԱՍՅԱՆ
.gif)
