Անվադողերի գինը կրկնակի թանկացել է: Այս հարցն այսօր 2017 թ. բյուջեի նախագծի քննարկման ժամանակ բարձրացրեց ՀԱԿ խմբակցության պատգամավոր Լյուդմիլա Սարգսյանը:
«Նշանակում է, որ երբ մասսայական անհրաժեշտություն է առաջանում, ոչ ոք չի կարողանում վերանայել գնաճը ու քաղաքացուն պաշտպանել նման ոտնձգություններից»,- ասել էր նա:
Այս մասով ArmLur.am-ը խոսեց ՏՄՊՊՀ մամլո խոսնակ Գայանե Սահակյանի հետ: Վերջինս մեզ հետ զրույցում նշեց, որ ՏՄՊՊՀ օրենքում իրեն վերապահված լիազորությունների շրջանակում ուսումնասիրություն է իրականացվում և վերահսկողություն բացառապես այն շուկաներում, որտեղ բարձր է կենտրոնացվածության աստիճանը:
«Ձեր կողմից նշված անվադողերի շուկայում գործում են մի քանի հարյուր տնտեսվարողներ: Այդ շուկայում հանձնաժողովի վերջին ուսումնասիրությունները փաստում են, որ չկա կենտրոնացվածության բարձր աստիճան, հետևապես այստեղ գնագոյացումը կարող է ձևավորել տարբեր գործոններով սկսած առաջարկ պահանջարկից, մինչև սեզոնայնության ավարտը»,-նշեց նա:
Մեր զրուցակցի խոսքով՝ գները ձևավորվումը շուկայական տնեսություն ունեցող բոլոր երկրներին ծանոթ մեթոդ է: Հանձնաժողովը չի կարող և երբևիցե գնագոյացման գին թելադրել կամ որոշել, թե շուկայում ինչ գին պետք է լինի, հանձնաժողովը նման իրավասություն չունի:
«Այս կամ այն շուկայում, եթե դրանք կենտրոնացվածություն ունեցող շուկաներ են, օրինակ՝ այդպիսիններից է կաթնամթերքի շուկան, իհարկե վարույթներ իրականացնում ենք , իսկ անվադողերի շուկան՝ ազատ, ցածր տնտեսություն ունեցող շուկա է և այստեղ գնագոյացման գործոնները բազմաթիվ են»,- եզրափակեց նա:
Լիդա Եղիազարյան
.gif)
