ՖՈՏՈ. Արարատի մարզում արագիլներ են անկել. ահազանգում են բնապահպանները

ՀՀ Արարատի մարզի Դարբնիկ եւ Հովտաշատ գյուղերի բնակիչները դիմել են «Թռչնասերների կենտրոն» հասարակական կազմակերպության նախագահ Սիլվա Ադամյանին եւ ահազանգել արագլիների անկման դեպքերի մասին: Անկման պատճառներն այս պահին հայտնի չեն: Բայց ՀԿ-ի նախագահ Սիլվա Ադամյան պնդմամբ, անկած արագիլները հրազենային վնասվածքները չեն ունեցել: Նա համոզված նշեց նաեւ, որ եղանակային պայմաններն ու էլեկտրալարերը թռչունների անկման պատճառը չեն եղել:

«Երբ գյուղերի բնակիչները մեզ ահազանգեցին, զարմացած էին. անընդհատ կրկնում էին, որ իրենք առաջին անգամ են նման բան տեսնում: Գյուղացիները մինչեւ մեր գալը 4 թռչուն արդեն թաղել էին: Ես ինքս ուսումնասիրեցի, որպեսզի պարզեի հրազենի վնասվածքներից է, թե ոչ, բայց հաստատ դա չէր: Ես իրավունք չունեմ դա տեղափոխելու Երեւան: Պետք է սպասենք: Բացի այդ, բների մեջ կային սատկած արագիլներ: Մինչեւ մեզ 4 արագիլ անկել են, իսկ մենք տեսել ենք եւս 4 անկած արագիլի, որից երկուսը բնից կախված վիճակում էին, երկուսն էլ ավտոճանապարհի վրա: Սա պատահական երեւույթ չէ»,- մտահոգվեց բնապահպան Սիլվա Ադամյանը:

Ապա`փոխանցեց, որ երկու նամակ է պատրաստել, որից մեկն ուղղված է առողջապահության, մյուսը`բնապահպանության նախարարություններին:
«Մենք իրենց իրավիճակն ենք նկարագրել եւ խնդրել, որ հետազոտական խմբեր ուղարկեն: Ես ինքս անձամբ նայել եմ անկած արագլիների դիերը, այսինքն այն ինչ որ մնացել էր, իրարից անջատված էր: Բազմաթիվ հիվանդություններ կան, որոնք տարածվում են թռչունների միջոցով: Չեմ ցանկանում մարդկանց վախեցնել, բայց անկումը մեզ շատ անհանգստացրել է»,- ArmLur.am-ի հետ զրույցում նկատեց Սիլվա Ադամյանը:

Սյունէ Համբարձումյան