Ժնեւում Սերժ Սարգսյանի եւ Իլհամ Ալիեւի երեկվա հանդիպման ուղերձները բավական հետաքրքրական էին: Ընդ որում, հետաքրքրական էին ե՛ւ հանդիպման արարողակարգային մասը, ե՛ւ դրանից հետո հնչեցված գնահատականները:
Սկզբում Ժնեւի ՄԱԿ-ի գրասենյակում՝ Շվեյցարիայի մշտական ներկայացուցչի կեցավայրում, տեղի է ունեցել հանդիպում ընդլայնված կազմով, որին ներկա են եղել ԵԱՀԿ ՄԽ համանախագահները, երկու երկրների ԱԳ նախարարները: Հետո արդեն Սարգսյանն ու Ալիեւն իրենց առանձնազրույցը շարունակել են բացօթյա՝ կեցավայրի բակում: Դատելով հրապարակված լուսանկարներից՝ առանձնազրույցը բավական ջերմ է ընթացել. նրանք զրույցի գոնե սկզբում չէին թաքցրել իրենց ժպիտը: ԵԱՀԿ ՄԽ համանախագահները ՀՀ-ի եւ Ադրբեջանի ԱԳ նախարարությունների հետ համատեղ հայտարարության մեջ նշել են, թե հանդիպումն անցել է կառուցողական մթնոլորտում. «Նախագահները համաձայնել են ձեռք առնել միջոցներ՝ բանակցային գործընթացն ավելի ինտենսիվ դարձնելու համար, եւ լրացուցիչ քայլեր կատարել՝ ուղղված շփման գծում լարվածության նվազեցմանը»:
Ավելի ուշ Սերժ Սարգսյանն էլ Շվեյցարիայի հայ համայնքի հետ հանդիպման ժամանակ խոսել է բանակցություններից՝ ասելով. «Մի քանի րոպե առաջ Ադրբեջանի նախագահի հետ հանդիպումն ավարտվեց. որեւէ կոնկրետ պայմանավորվածություն, այսպես ասած, չունենք, խնդրի լուծման տարբերակների մասին: Բայց պայմանավորվել ենք, որպեսզի միջոցներ ձեռնարկենք լարվածությունն է՛լ ավելի թուլացնելու, որպեսզի առաջնագծում չունենանք զոհեր: Պետք է ասեմ` ե՛ւ Ադրբեջանի նախագահը, ե՛ւ ես դրանում խորապես շահագրգռված ենք: Տա Աստված, որ միշտ այդպես կարծի: Նա էլ շատ լավ է հասկանում խնդրի բարդությունը, բնականաբար, ես էլ, բայց խնդիրն այնպիսին է, որ հեշտ լուծում երբեք չի լինելու: Սակայն մի հարցում էլ ուզում եմ, որ բոլորդ վստահ լինեք. մեզ համար չկա լուծում, որը կարող է ինչ-որ կերպ խաթարել Ղարաբաղի անվտանգությունը: Մեզ համար միակ լուծումն այն է, որ Ղարաբաղը լինի Ադրբեջանից դուրս»:
Պատահական չէ, որ հիմնահարցի լուծման ուղիների մասին այդպես էլ որեւէ խոսք չի գնացել, եւ առաջին հերթին կարեւորվել են լարվածության նվազեցումը, հրադադարի ռեժիմի պահպանումը: ԼՂ խնդրի լուծման ընդհանուր սկզբունքները պարզ են, եւ դրանք ընդունվել են ի սկզբանե: Պարզապես այս ամենը կյանքի կոչելու համար պետք է առաջին հերթին փոխվստահություն, ինչը հնարավոր է միայն հրադադարի ռեժիմի պահպանման, այլ ոչ թե լարվածության խորացման դեպքում: Ի դեպ, Արցախը պաշտոնապես հայտարարել է, որ առանց իրենց հետ ուղիղ բանակցությունների լուծում չի կարող լինել:
.gif)
