Երեկ մի խումբ քաղաքական գործիչներ, հասարակական տարբեր խավերի ներկայացուցիչներ հանդես են եկել հայտարարությամբ: Ըստ տարածված հայտարարության` ստորագրահավաք է իրականացվել` ընդդեմ Հայաստանի դատաիրավական համակարգի, դատավորների եւ Սահմանադրական դատարանի հանդեպ իրականացվող բիրտ ճնշումների:
«Ակնհայտ է` «Մարտի 1»-ի` դատաքննության փուլում գտնվող գործը չի տալու գլխավոր հարցի պատասխանը` ով է մեղավոր 10 մարդու կյանքից զրկելու համար: Սա «Մարտի 1»-ի գործ չէ, այլ ԼՂՀ առաջին եւ ՀՀ երկրորդ նախագահի հանդեպ քաղաքական հալածանք, ցանկացած գնով նրան անազատության մեջ պահելու սեւեռում»,- նշված է հայտարարությունում: Ստորագրահավաքին միացածները իշխանություններին կոչ են արել դադարեցել հակասահմանադրական գործընթացը, զերծ մնալ հակապետական գործողություններից ու պահանջել են փոխել Ռ. Քոչարյանի խափանման միջոցը:
Երեկ «Ժողովուրդ» օրաթերթը զրուցել է ԱԺ ԲՀԿ խմբակցության նախկին պատգամավոր Վարդան Բոստանջյանի հետ:
-Պարո՛ն Բոստանջյան, Դուք համարո՞ւմ եք, որ ՀՀ երկրորդ նախագահ Ռոբերտ Քոչարյանը ապօրինի է պահվում կալանքի տակ ու պետք է նրան ազատ արձակե՞լ:
-Ես առաջին իսկ օրն եմ ասել, որ դա քաղաքական հետապնդում է, ես ասել եմ, որ Ռոբերտ Քոչարյանը քաղաքական բանտարկյալ է:
-Այսինքն` Դուք կարծում եք, որ Ռոբերտ Քոչարյանը մեղավոր չէ՞ 2008 թվականի մարտի 1-ի իրադարձությունների հետ համար: Ինչի՞ համար պետք է իշխանությունները ապօրինի նրան պահեին կալանքի տակ:
-Ես մարտի 1-ի հետ կապված որեւէ բան չեմ ասում, ես ասում եմ, որ ամբողջ պետական ապարատը, ամբողջ համակարգն ունի իր մեղավորությունը: Մենք հայտարարությամբ պահանջում ենք օբյեկտիվ մոտեցում հարցին, այն իրականությանը, որ կա, պետք է լինել օբյեկտիվ, որը ես այս պարագայում չեմ նկատում:
-Կարծում եք` իշխանությունները կարողանում են դատական համակարգի վրա ճնշում գործադրել, որպեսզի Ռ. Քոչարյանին կալանքի տակ պահելու որոշում կայացնե՞ն:
-Իսկ Դուք ի՞նչ եք մտածում, բնականաբար, բոլոր դեպքերում մենք հասկանում ենք, թե ինչ է կատարվում: Ես կարծում եմ` բոլորս էլ տեսնում ենք, թե սուբյեկտիվ մոտեցումներն ինչպես են լինում այս հարցի հետ կապված: Ես կրկնում եմ, որ մեր պահանջն այն է, որ լինի օբյեկտիվ քննություն, ամբողջ համակարգի հետ կապված հարցը պետք չէ այդպես քննել:
-Իսկ Դուք ի՞նչ եք կարծում, ինչ պատասխան պետք է տալ այն 10 զոհերի ծնողներին, ովքեր տարիներ շարունակ սպասել են, որ բացահայտվի իրենց զավակների սպանության իրողությունը: Նրանք էլ պահանջում են, որ անպայման Ռ. Քոչարյանը գտնվի կալանքի տակ. այդ մասին մտածե՞լ եք:
-Այդ պահանջը միշտ է լինելու, իրենք միշտ էլ ցանկանալու են, որպեսզի բացահայտվի այն, ինչ եղել է 2008 թվականի մարտի 1-ին, բայց մենք էլ ասում ենք, որ պետք է պահանջել օբյեկտիվ քննություն իրականացնել: Այդ ծնողները միշտ էլ պետք է պահանջեն արդարություն, պետք է իսկապես ցանկանան, որպեսզի բացահայտվի իրողությունը: Մենք եթե ցանկանում ենք, որպեսզի գտնեն մեղավորներին, պետք է լինենք օբյեկտիվ: Մենք դիմել ենք, որպեսզի լինի օբյեկտիվ քննություն, մենք այլ բան չենք ասել:
-Ի՞նչ եք ակնկալում իշխանություններից, ինչպիսի՞ արձագանքի եք սպասում:
-Որեւէ բան չեմ կարող ասել, ես` որպես ՀՀ քաղաքացի, որպես երեւույթի վերաբերյալ օբյեկտիվ մտածող, արտահայտել եմ իմ մտահոգությունը այդ ամենի վերաբերյալ, բայց թե իշխանությունը ինչպես կարձագանքի այդ ամենին, ես, հավատացեք, որեւէ բան չեմ կարող ասել:
.gif)
