Ucom-ում լավ օրեր դեռ երկար չեն լինի. վրացական բացահայտումներ

Վրացական լրատվամիջոցներն անդրադարձել են Հայաստնում UCOM ընկերության շուրջ ստեղծված իրավիճակին, ընդ որում լրատվամիջոցները նկատել են, որ այդ գործի հետ կապված որոշ մարդիկ իրենց նախկին գործունեությամբ կապված են եղել Վրաստանի հետ:

Ինչպես հայտնում է «Բանկեր և ֆինանսներ» հրատարակչությունը,  ՀՀ-ում գործող խոշոր ինտերնետային ծառայություններ մատուցող Ucom ընկերությունում տարաձայնություններ են առաջացել:

Մասնավորապես ընկերության աշխատակիցների մեծ մասը աշխատանքից ազատման դիմում է գրել այն բանից հետո, երբ նրանց հայտնի է դարձել, որ ընկերության բաժնետերերը Ucom-ի գլխավոր տնօրեն են նշանակել «Բիլայն Հայաստան» ընկերության ղեկավար Անդրեյ Պյատախինին, իսկ գործող տնօրեն Հայկ Եսայանն այդ մասին անգամ չի տեղեկացվել:

Հրատարակչությունը մասնավորապես շեշտում է, որ «Անդրեյ Պյատախինը 2009-2011 թթ ղեկավարել է «Բիլայն Վրաստանը» և վերջինս ստիպված է եղել լքել այդ պաշտոնը՝  բավական ծանր մեղադրանքների հետևանքով: Այդ ժամանակ գործը չի հասել քրեական հետապնդման, սակայն գործին լավ ծանոթ գործարարները, նշում են, որ Մոսկվան Պյատախինին հետ է կանչել վրացական Բիլայնում լայնածավալ ու համակարգային ապօրինությունների պատճառով»:

Ինչպես արդեն հայտնել էր  Armlur.am-ը, «Յուքոմ» ընկերության շուրջ 12 օր տևած խառը և մասամբ անհասկանալի պատմությունը սկսվեց այն բանից հետո, երբ «Բիլայն Հայաստան» ընկերությունը գնեց Ucom ընկերության բաժնետոմսերի ողջ փաթեթը :

Վրացական հրատարակչությունը նաև նշում է, որ եթե Ucom  ընկերությունը բարեհաջող կերպով անցնի Պյատախինի հսկողության տակ, ապա , հաշվի առնելով վրացական փորձը, հայերը պետք է ակնկալելն, որ Հայաստանում ինտերնետային ծառայություններ մատուցող խոշորագույն ընկերությունում լավ օրեր դեռ երկար չեն լինի: