Երևանի ընդհանուր իրավասության դատարանը բավարարել է Հանրային ծառայությունները կարգավորող հանձնաժողովի նախկին անդամ Մուշեղ Կոշեցյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։ Մեղադրանքն առաջադրվել է ՀՀ ՔՕ 308-րդ հոդվածի 2-րդ մասով, այսինքն՝ պաշտոնեական լիազորությունների չարաշահելը՝ նույն գործի շրջանակներում, որով մեղադրանք է առաջադրված նաև այդ կառույցի նախկին նախագահ Ռոբերտ Նազարյանին:
Նշենք, որ բացի Կոշեցյանից եւ Նազարյանից, մեղադրանքներ են առաջադրված նաեւ հանձնաժողովի նախագահի նախկին տեղակալ Նիկոլայ Գրիգորյանին եւ նախկին անդամ Շիրազ Կիրակոսյանին: Նրանց բոլորի մասով էլ քննիչը միջնորդություն է ներկայացրել կալանավորումը որպե խափանման միջոց ընտրելու համար:
Ինչպես արդեն տեղեկացվել է, քրեական գործի նախաքննության ընթացքում բավարար ապացույցներ են ձեռք բերվել, որ Ռոբերտ Նազարյանի և հանձնաժողովի վերը նշված անդամների գործողությունների պատճառով «Ձորագետ Հիդրո» ՍՊ ընկերության հիդրոէլեկտրակայանից արտադրված և առաքված էլեկտրական էներգիայի վաճառքի համար 2012-2019 թվականների ընթացքում սահմանվելիք սակագների փոխարեն նույն ժամանակահատվածների համար սահմանվել են կրկնակին գերազանցող սակագներ, որի հետևանքով «Ձորագետ Հիդրո» ՍՊ ընկերության կողմից ՀՀ-ում էլեկտրաէներգիա սպառող ֆիզիկական և իրավաբանական անձանցից հավելյալ ստացվել է առանձնապես խոշոր չափերի՝ 7,052,065,099 ՀՀ դրամ գումար:
.gif)
