ՏԵՍԱՆՅՈՒԹ․ Դատարանն ԱԺ նախկին պատգամավոր Մելիք Մանուկյանին՝ Շշի Մելոյին կյանքից զրկելու փորձի գործով որոշում է կայացրել

ArmLur.am-ին հայտնի դարձավ, որ ՀՀ վերաքննիչ քրեական դատարանը ԱԺ նախկին պատգամավոր Մելիք Մանուկյանի սպանության փորձի գործով որոշում է կայացրել: Եվ ահա մեզ հայտնի դարձավ, որ դատարանը անփոփոխ է թողել Կոտայքի մարզի ընդհանուր իրավասության դատարանի որոշումը եւ ճիշտ գտել, որ  սպանության փորձի մեջ մեղադրվողները կապ չունեն միջադեպի հետ, ուստի նրանք արդարացվել են: Ստացվում է, որ այդպես էլ իրավապահները չկարողացան գտնել, թե ով կամ ինչու փորձեց սպանել ՇՇի Մելոյին, միգուցե Մելիք Մանուկյանը հոգու խորքում շատ լավ գիտի, թե ինչու են ընկել իր հետեւից:

Հիշեցնենք, որ Գլխավոր դատախազությունը բողոք է ներկայացրել ՀՀ վերաքննիչ դատարան ԱԺ նախկին պատգամավոր, գործարար Մելիք Մանուկյանի՝ «Շշի Մելոյի» նկատմամբ մահափորձի գործով: ArmLur.am-ին հայտնի դարձավ, որ մեղադրող դատախազը պահանջում է, որ նախկին պատգամավորի դեմ մահափորձի գործով մեղադրյալներին դատապարտեն 20 տարի ժամկետով:

Նշենք, որ շուրջ 3 տարի առաջ իրականացված սպանության փորձի գործով արդարացման դատական ակտ էր կայացվել։ Կոտայքի մարզի ընդհանուր իրավասության դատարանը՝ դատավոր Գոռ Շահբազյանի նախագահությամբ, հրապարակել է վճիռը, համաձայն որի՝ ամբաստանյալներ Արթուր Մխիթարյանը, Ջեմսիկ Մարտիրոսյանը և Պետրոս Էլբակյանն արդարացվել են՝ սպանության փորձի, ապօրինի զենք-զինամթերքի և գույքի դիտավորության ոչնչացման դրվագներով։
Ամբաստանյալներից մեկը՝ Ջեմսիկ Մարտիրոսյանը, մեղավոր է ճանաչվել ՀՀ քրեական օրենսգրքի 112-րդ հոդվածի հատկանիշներով (դիտավորությամբ առողջությանը ծանր վնասվածք պատճառելը) առաջադրված մեղադրանքում՝ դատապարտվելով ազատազրկման՝ 4 տարի 6 ամիս ժամկետով։
Հիշեցնենք, որ «Շշի Մելոյի» սպանության ենթադրյալ փորձը տեղի է ունեցել 2019թ օգոստոսի 2-ին՝ Երեւան-Սեւան ավտոճանապարհին, Մելիք Մանուկյանին պատկանող ապակե տարաների գործարանի մոտ։

Դեպքի առթիվ հարուցվել էր քրեական գործ ՀՀ ՔՕ-ի 34-104 -րդ հոդվածի 2-րդ մասի 6-րդ կետի՝ շատերի կյանքի համար վտանգավոր եղանակով սպանության փորձը եւ ՔՕ 235 -րդ հոդվածի 1-ին կետի՝ ապօրինի կերպով զենք–զինամթերք ձեռք բերելը, պահելը հոդվածների հատկանիշներով: Գործի շրջանակներում կալանավորվել են Շիրակի մարզի բնակիչներ 56-ամյա Արթուր Մխիթարյանը, 53-ամյա Պետրոս Էլբակյանը եւ 45-ամյա Ջեմսիկ Մարտիրոսյանը, որոնք չեն ընդունում առաջադրված մեղադրանքը և հերքում են իրենց առնչությունը կատարված դեպքի հետ։

Քնար Մանուկյան