Ես մամայիս ու պապայիս «մարդն եմ». Օպերայի թատրոնի տնօրեն

Օպերայի և բալետի ազգային ակադեմիական թատրոնի տնօրեն Անդրանիկ Արզումանյանը armlur.am-ի հետ զրույցում ասաց, որ ամենակարևոր խնդիրը, որը դրել է իր առաջ,  այն է, որ օպերայի և բալետի թատրոնը պիտի լինի այն բարձունքում, որում եղել է նախկինում: «Մի 10 օրվա ընթացքում դեռ շուտ է ինչ-որ բաներ  հայտարարել»,- ասաց  տնօրենը:

Ինչ վերաբերում է Ռուդոլֆ Խառատյանի` գլխավոր  բալեսմայստերի պաշտոնից հեռանալուն, Արզումանյանի խոսքով` պրն Խառատյանը սեփական ցանկությամբ է հեռացել. «Իր խնդրանքով իրեն նշանակել ենք որպես հրավիրված գլխավոր բալետմայստեր, որպեսզի նա զբաղվեր իր ստեղծագործական աշխատանքով»:

Ռուդոլֆ Խառատյանի փոխարեն գլխավոր բալետմայստեր է նշանակվել Վիլեն Գալստյանը, որը, ըստ Արզումանյանի, մեծ օգուտ կբերի մեր թատրոնին:

-Պրն Արզումանյան, իսկ կադրային ջարդ լինելո՞ւ է:

-Դեռ կադրային ջարդ անելը շուտ է, բայց քանի որ մեզ մոտ կառուցվածքային փոփոխություններ մինչև հուլիս ամիսը սպասվում են,  բնականաբար կադրային փոփոխություններ կլինեն: Բայց կադրային ջարդին կողմնակից չեմ առաջին օրվանից:

-Նոր կադրեր բերելիս ի՞նչ չափորոշիչով եք առաջնորդվելու:

-Միմիայն պրոֆեսիոնալիզմի չափորոշիչով:

-Ձեր նշանակման առաջին օրվանից եղան հայտարարություններ այն մասին, որ դուք Հասմիկ Պողոսյանի ու Արմեն Սմբատյանի «մարդն եք», ում բերել են, որ աշխատանք ունենա: Հիմա Դուք ո՞ւմ  «մարդն եք»:

-Ես մամայիս ու պապայիս «մարդն եմ»:

-Իսկ նման խոսակցություններին ինչպե՞ս եք  վերաբերում:

-Ես ամբողջ օրն աշխատում եմ, ուշադրություն չեմ դարձնում նման խոսակցությունների: Ես զարմանում եմ` ինչպե՞ս են մարդիկ  հասցնում աշխատել, եթե ամբողջ օրը նման խոսակցություններով են զբաղվում:

 Սոնա Դավթյան