Ավելի քան 130 հորդանանցի քաղաքական, ակադեմիական, մշակութային, արհմիութենական և ցեղային գործիչներ կոչ են արել դուրս բերել բոլոր օտարերկրյա զորքերը Հորդանանից և վերանայել կամ չեղարկել Միացյալ Նահանգների հետ գործող ռազմական համագործակցության համաձայնագիրը։
Նրանց հայտարարության մեջ նշվում է, որ օտարերկրյա ուժերի ներկայությունը երկիրը ենթարկում է անվտանգության, քաղաքական և տնտեսական ռիսկերի, ինչպես նաև մեծացնում է Հորդանանի՝ տարածաշրջանային հակամարտությունների մեջ ներքաշվելու վտանգը։ «Հորդանանը այս պատերազմի կողմ չէ, և նրա ժողովուրդը չպետք է կրի դրա հետևանքները»,– ընդգծել են հայտարարության հեղինակները։
Կոչը հնչել է այն բանից հետո, երբ Հորդանանում տեղակայված ամերիկյան օբյեկտները մի քանի անգամ ենթարկվել են Իրանի հրթիռային և անօդաչու թռչող սարքերի հարձակումներին, ինչը նոր քննարկումներ է առաջացրել ԱՄՆ ռազմական ներկայության հետևանքների շուրջ։
Ստորագրողները պահանջել են, որ ԱՄՆ-ի հետ 2021 թվականին ստորագրված պաշտպանական համագործակցության համաձայնագիրը ներկայացվի խորհրդարանի քննարկմանը։ Նրանց կարծիքով՝ հասարակությունն ու ընտրված ներկայացուցիչները պետք է հնարավորություն ունենան գնահատելու այն պարտավորությունները, որոնք կարող են ազդել երկրի ինքնիշխանության և ազգային անվտանգության վրա։
Նրանք նաև կոչ են արել իշխանություններին բացառել Հորդանանի օդանավակայանների, նավահանգիստների, ռազմական բազաների և այլ ռազմավարական ենթակառուցվածքների օգտագործումը տարածաշրջանային ռազմական գործողությունների համար՝ շեշտելով, որ երկիրը պետք է պահպանի «իրական չեզոքություն» և խուսափի արտաքին հակամարտություններում ներգրավվելուց։
Հայտարարության հեղինակները նշել են, որ տարածաշրջանում շարունակվող էսկալացիան սպառնում է Հորդանանի տնտեսությանը, ներքին կայունությանը և հարևան երկրների հետ հարաբերություններին։ Նրանք նաև ընդգծել են, որ երկրի զինված ուժերը պետք է կենտրոնանան բացառապես Հորդանանի պաշտպանության և ազգային անվտանգության ապահովման վրա։
.gif)
