ԱԺ-ն ձևավորվել է, կայքում «դատարկություն» է. ինչով են զբաղված պատասխանատուները

«Ժողովուրդ» օրաթերթը նկատել է ուշագրավ և միաժամանակ մտահոգիչ մի հանգամանք. արդեն շուրջ տասը օր է անցել այն պահից, երբ օգոստոսի 2-ին պաշտոնապես ձևավորվեց Հայաստանի Հանրապետության նոր Ազգային ժողովը, սակայն խորհրդարանի պաշտոնական կայքը՝ parliament.am-ը, մինչ օրս ամբողջությամբ չի արտացոլում նոր ձևավորված օրենսդիր մարմնի կազմը։

Կայքի համապատասխան բաժիններում դեռևս բացակայում են նոր պատգամավորների լուսանկարները, կենսագրությունները, անձնական տվյալները, քաղաքական և մասնագիտական անցած ուղու մասին տեղեկությունները։ Փաստացի ստացվում է, որ հանրությունը, որը մասնակցել է ընտրություններին և իր քվեն տվել քաղաքական ուժերին, այսօր զրկված է տարրական հնարավորությունից՝ պարզելու, թե ովքեր են ստացել պատգամավորական մանդատ, ինչ փորձ ունեն, ինչ գործունեությամբ են զբաղվել մինչև խորհրդարան մտնելը և անգամ ինչպես են նրանք տեսք ունենում։

Սա արդեն պարզապես տեխնիկական վրիպակ չէ։ Խոսքը վերաբերում է հանրային վերահսկողությանը և թափանցիկությանը, որոնք ժողովրդավարական կառավարման հիմնարար սկզբունքներից են։ Ազգային ժողովը երկրի գլխավոր օրենսդիր մարմինն է, և նրա պաշտոնական կայքը պետք է լինի ոչ թե ձևական հարթակ, այլ քաղաքացիների համար տեղեկատվության առաջնային և վստահելի աղբյուր։

Առավել զարմանալի է, որ ընտրություններից հետո քաղաքական ուժերը հասցրել են անցկացնել նիստեր, ձևավորել խմբակցություններ, ընտրել ղեկավար կազմ, հանդես գալ հայտարարություններով, մինչդեռ խորհրդարանի պաշտոնական ռեսուրսը շարունակում է ներկայացնել թերի և կիսատ պատկեր։

Թվում է՝ նոր խորհրդարանը ձևավորվել է, մանդատները բաժանվել են, նիստերն ընթանում են, բայց պաշտոնական կայքը դեռ չի հասկացել, որ Հայաստանում արդեն նոր Ազգային ժողով կա։

Սոնա Գրիգորյան