Իրանը պատրաստվում է Հորմուզի նեղուցով նավերի համար նոր երթուղի հայտարարել․ նոր զարգացումներ

Իրանը առաջիկա օրերին պատրաստվում է հայտարարել Հորմուզի նեղուցի մերձակայքում սահմանափակ գոտու ստեղծման և նավագնացության համար նոր երթուղու մասին։ Իրանի անվտանգության ոլորտի բարձրաստիճան պաշտոնյա Մոհսեն Ռեզային հայտնել է, որ նոր երթուղին համաձայնեցվել է Օմանի հետ։

Ռեզային նշել է, որ նոր երթուղու վերաբերյալ որոշումները կհրապարակվեն «առաջիկա օրերին»։ Նոր կարգավորումների նպատակն է ապահովել նավագնացության կազմակերպումը Հորմուզի նեղուցում, որը համարվում է համաշխարհային նավթային առևտրի կարևորագույն ծովային ուղիներից մեկը։

Միևնույն ժամանակ, Իսրայելի հարվածները շարունակվում են Լիբանանի հարավային շրջաններում։ Ալ Ջազիրայի փոխանցմամբ՝ Կֆար Ռուման բնակավայրում իսրայելական հարվածների հետևանքով զոհերի թիվը հասել է առնվազն 11-ի։

Լիբանանի պետական լրատվական գործակալության տվյալներով՝ զոհերից 9-ը, այդ թվում՝ երկու մանկահասակ երեխա, զոհվել են բնակելի շենքին հասցված հարվածի հետևանքով։ Եվս երկու մարդ զոհվել է նույն բնակավայրում քաղաքացիական մեքենայի ուղղությամբ իրականացված անօդաչու թռչող սարքի հարվածի հետևանքով։ Հաղորդվում է նաև վիրավորների մասին։

Իսրայելական հարվածների հետևանքով զոհերի թվում են նաև երկու բուժաշխատողներ։

Միաժամանակ, Գազայի հատվածում իսրայելական հարվածի հետևանքով զոհվել է 8-ամյա աղջիկ, որը դպրոցական տարվա առաջին օրը տուն վերադառնալիս գտնվել է մեքենայում։ Հարձակման հետևանքով ևս վեց մարդ վիրավորվել է։

Իրավիճակի ֆոնին Իսրայելից հեռացող բժիշկների թվի վերաբերյալ հրապարակվել է նաև նոր ուսումնասիրություն։ Թել Ավիվի համալսարանի հետազոտության համաձայն՝ 2023-2025 թվականներին առնվազն 1370 իսրայելցի բժիշկ երկրից հեռացել է առնվազն մեկ տարով։ Իսրայելական լրատվամիջոցների փոխանցմամբ՝ այդ թիվը գրեթե կրկնակի գերազանցում է 2013-2015 թվականների ցուցանիշը։

Իրանի և Իսրայելի միջև ռազմական լարվածության շարունակության պայմաններում Հորմուզի նեղուցի շուրջ ցանկացած նոր սահմանափակում կարող է կարևոր նշանակություն ունենալ տարածաշրջանային և միջազգային նավագնացության համար։

Անի Վարդանյան