Եղբոր հետ կենակցել է, հետո նրան մեղադրել բռնաբարության մեջ

Armlur.am-ը դատական տեղեկատվական համակարգից տեղեկացավ, որ դատարանը կայացրել է սուտ մատնության մեջ մեղադրվող 23-ամյա Մերի Գաբրիելյանի վճիռը:

Տեղեկացնենք, որ ըստ մեղադրական եզրակացության` Մ. Գաբրիելյանը 2013թ. ներկայացել է Եղեգնաձորի ոստիկանության բաժին և պատմել, թե իր երկու եղբայրները` Արման և Անդրանիկ Գալստյանները, իր կամքին հակառակ՝ խմբակային սեռական հարաբերություններ են ունեցել իր հետ:

Սակայն այս մեղադրանքն ավելի ուշ հենց կնոջ դեմ է շրջվել: Նրան մեղադրանք է առաջադրվել ՀՀ ՔՕ 333 հոդվածի չափանիշներով (սուտ մատնություն):

Իրականում քննությամբ պարզ է դարձել, որ կինը կենակցել է եղբայրների հետ իր կամքով և առանձին-առանձին:

Տևական ժամանակ հանդիպելուց և սեռական հարաբերություններ ունենալուց Արման Գալստյանի հետ, Մերին չի կարողացել համակերպվել այն փաստի հետ, որ տղամարդը որոշել է խզել իր հետ կապերը` ընտանեկան խնդիրներից խուսափելու համար:

Նրա հետ հարաբերությունները շարունակելու նպատակով կինը դիմել է նրա հորեղբոր որդուն` Անդրանիկ Գալստյանին` խնդրելով միջնորդել ու հաշտեցնել իրենց, բայց վերջինը հրաժարվել է:

Դրանից հետո Վայոց ձորի մարզի Վերնաշեն համայնքի վարչական տարածքում գտնվող, Օնիկ Մկրտչյանին պատկանող տնակում Մերի Գաբրիելյանն իր կամքով Անդրանիկ և Արման Գալստյանների հետ մեկական անգամ սեռական հարաբերություն ունենալու պարագայում, վրեժխնդրության շարժառիթից ելնելով, հաջորդ օրը կատարել է սուտ մատնություն, թե Գալստյանները սպառնալիքների ազդեցության տակ խմբով իրեն բռնաբարել և իր նկատմամբ սեքսուալ բնույթի բռնի գործողություններ են կիրառել:

Եղեգնաձորի ընդհանուր իրավասության դատարանը, քննելով գործը, Մերի Գաբրիելյանին մեղավոր է ճանաչել եւ դատապարտել 1 տարվա ազատազրկման, սակայն պատիժը նրա նկատմամբ պայմանականորեն չի կիրառվել. դատարանը սահմանել է փորձաշրջան՝ 2 տարի ժամկետով։