Վերջին ամիսներին ռուբլու փոխարժեքի անկումը զգալի դժվարություններ է առաջացրել տեղական արտադրողների համար: «Թամարա ֆրութ» ընկերության սեփականատեր Բորիս Հովհաննիսյանը «Ժողովուրդ»-ի հետ զրույցում խոստովանեց, որ պահեստավորված արտադրանքը չփչացնելու եւ ռուսական շուկան չկորցնելու համար իրենք հարկադրված են եղել նախորդող ամիսներին ակնկալվող շահույթի տոկոսը զգալիորեն նվազեցնել, երբեմն էլ՝ ընդհուպ մինչեւ զրոյական եկամուտով աշխատել: Հարկ է նկատել, որ առկա գործընթացներից դժգոհում է նաեւ խոշոր ընկերության տնօրենը: Նման պայմաններում դժվար չէ պատկերացնել մանր ընկերությունների վիճակը:
Տեղեկացնենք, որ «Թամարա ֆրութ» ՓԲԸ-ն ստեղծվել եւ գործում է 2002 թվականից: Այն զբաղվում է մրգերի եւ բանջարեղենի խորը սառեցմամբ եւ մրգային հյութերի արտադրությամբ: Միեւնույն ժամանակ ընկերությունն արտադրում է կոմպոտների, մուրաբաների, ջեմերի եւ պահածոյացված բանջարեղենի լայն տեսականի: Կազմակերպությունը չի սահմանափակվում իր արտադրանքը ներկայացնելով միայն տեղական շուկայում, այն նաեւ գործընկերներ ունի ինչպես Ռուսաստանում, այնպես էլ Եվրոպայում, Ամերիկայի Միացյալ Նահանգներում:
Արտահանման հետ կապված խնդիրների շուրջ «Ժողովուրդ»-ը զրուցել է «Թամարա ֆրութ» ընկերության տնօրեն Բորիս Հովհաննիսյանի հետ:
-Պարո՛ն Հովհաննիսյան, իշխանությունները խոստանում էին, որ Եվրասիական տնտեսական միությանը Հայաստանի անդամակցությունից հետո ՀՀ-ի համար լայն հեռանկարներ եւ մեծ շուկա է բացվելու: Դուք՝ որպես տեղական արտադրող, ի՞նչ արդյունքներ ունեք անցած երկու ամիսների ընթացքում:
-Իհարկե, հեռանկարներ կային, եթե ռուբլու փոխարժեքի անկումը չլիներ, ապա մեր ընկերությունը շատ լուրջ հաջողություններ կգրանցեր: Միակ խնդիրը դա է: Նույնիսկ նոյեմբեր ամսին սկսեցինք սառեցված սպանախ արտահանել, որը նախատեսված չէր: Պատճառն այն էր, որ ռուսական կողմը Լեհաստանից չէր ներմուծում: Այնուամենայնիվ, մենք մոտավորապես 700-800 հազար դոլարի չափ ավել արտադրանք կարտահանեինք, եթե ռուբլու փոխարժեքի անկումը չլիներ: Արտադրանք ունենք, պահեստներում լցված է, բայց մենք աշխատում ենք չկորցնել ռուսական շուկան. օրինակ՝ զեղչեր ենք անում, աշխատում ենք զրոյական եկամուտով: Բայց սրան զուգահեռ՝ փորձեր ենք անում գրավել նաեւ Գերմանիայի շուկան: Վաղն արտադրանք ենք արտահանելու նաեւ դեպի Իսրայել: Ներքին շուկան նույնպես փորձում ենք զարգացնել: Ի վերջո, դժվարությունները պետք է հաղթահարենք:
-Ստացվում է, որ պահեստավորված մեծ քանակությամբ արտադրանք ունեք, դրա փչանալու վտանգը կա՞:
-Ո՛չ: Բայց նախորդ տարվա երեք ամիսներին մենք 800-ից 1 մլն դոլարի արտադրանք պակաս վաճառեցինք: Իսկ մինչ այդ մեր գործերը հաջող էին:
-Ներկայումս ռուսական շուկայի հետ վնասո՞վ եք աշխատում:
-Ո՛չ, վնասով չենք աշխատում, ուղղակի եկամուտ չենք ունենում: Չէ որ մենք բավականին զեղչեր ենք արել: Ավելի լավ է զրոյական եկամուտով աշխատել, քան շուկան կորցնել: Օրինակ՝ այս տարվա հունվար, փետրվար ամիսներին, նախորդ տարվա նույն ժամանակահատվածի համեմատ, մեր ընկերությունն ընդամենը երկու մեքենա արտադրանք է արտահանել: Իհարկե, սա մանր տնտեսությունների համար մեծ թիվ է, բայց մեր ընկերության համար՝ ոչ:
-Իսկ մինչ այս Ձեր ընկերությունը ներկայացվա՞ծ էր ռուսական շուկայում:
-Ռուսական շուկայում մենք վաղուց ենք ներկայացված եղել, բայց վերջին երկու տարիներին բավականին ակտիվ ենք: ՌԴ-ում մենք գործընկեր ունենք, ով խոշոր չափի ներդրումներ է կատարել՝ մեր ընկերության արտադրանքը գովազդելու նպատակով: Ամեն դեպքում, հույս ունենք, որ ամեն ինչ կվերականգնվի, եւ ռուբլին կարժեւորվի: Մեր ընկերությունը նախորդ տարի բավականին մեծացրեց իր արտադրության ծավալները: Ես պատրաստ եմ նախորդ տարվա շրջանառության հնգապատիկը արտահանել ՌԴ՝ պահպանելով նաեւ Եվրոպայի, ԱՄՆ-ի, Ղազախստանի, Ուկրաինայի շուկաները:
-Իսկ ներքին շուկայի մասին ի՞նչ կասեք:
-Ներքին շուկայում պետք է աշխատենք ավելի ներկայացված լինել: Այս պահին խնդիրներ կան մեր առջեւ դրված. այսինքն՝ մենք պետք է դեռ գոյատեւենք, այնպես անենք, որպեսզի աշխատակիցներ չկրճատենք եւ այլն:
-Պարո՛ն Հովհաննիսյան, հնարավոր է՝ առաջիկայում գազի եւ էլեկտրաէներգիայի սակագները թանկանան: Դա ինչպե՞ս կանդրադառնա Ձեր արտադրության վրա:
-Հույս ունեմ, որ չի թանկանա: Այդ առումով դեռ բանակցություններ են ընթանում, ես ինքս հետեւում եմ: Բայց դա էապես չի կարող անդրադառնալ արտադրանքի գների վրա: Ավելի հավանական տարբերակ է, որ դոլարի փոխարժեքի բարձրացման հետեւանքով արտադրանքի գինը թանկանա, քան այս դեպքում:
ՍՅՈՒՆԷ ՀԱՄԲԱՐՁՈՒՄՅԱՆ
.gif)
