Հոկտեմբերի 7-ին տեղի ունեցավ ՀՀ քննչական կոմիտեի կոլեգիայի հանդիսավոր նիստ՝ նվիրված ՀՀ քննչական կոմիտեի ծառայողի օրվան, որին մասնակցում էին ՀՀ քննչական կոմիտեի կոլեգիայի անդամները, տարածքային և կառուցվածքային ստորաբաժանումների ղեկավարներ, աշխատակիցներ։ Շնորհավորելով ՔԿ ծառայողներին մասնագիտական տոնի կապակցությամբ՝ ՀՀ ՔԿ նախագահ Աղվան Հովսեփյանն արձանագրեց, որ թեև կոմիտեն դեռ երկու տարվա կյանք ունի, բայց պետք է փաստենք, որ այս կարճ ժամանակահատվածում զգալի աշխատանքներ են կատարվել կազմավորման ու կայացման ուղղությամբ և այսօր հիրավի իր ուրույն տեղն ու դերն ունի դատաիրավական ոլորտում՝ որպես անկախ քննչական մարմին։ Մշակվել և ներդրվել են կոմիտեի կառուցվածքային և տարածքային ստորաբաժանումների արդյունավետությունը բարձրացնող մի շարք ծրագրեր՝ օգտագործելով ժամանակակից տեղեկատվական տեխնոլոգիաների հնարավորությունները, որոնց շնորհիվ էապես բարելավվել են կազմակերպական աշխատանքները։
Ու չնայած այսօր շատերն են փաստում, որ ՔԿ-ն կայացած պետական մարմին է, սակայն, ինչպես նշեց Աղվան Հովսեփյանը, ամենաբարձր գնահատականը կլինի այն, որ յուրաքանչյուր քրեական գործով քննիչը դրսևորի իր անկախությունն ու ինքնուրույնությունը՝ որպես դատավարական անձ։ «Դուք չպետք է շլանաք փրփուրների փայլով, այլ փնտրեք ու գտնեք ապացույցներ, որոնք կլինեն անարատ, անբիծ ու իրական։ Այսինքն՝ պետք է լինեն օրինական ճանապարհով ձեռք բերված և անսխալ, քանի որ ձեր աշխատանքի շնորհիվ է, որ արդարադատության իրականացմամբ որոշվում են մարդկային ճակատագրեր»,- հայտարարեց ՀՀ ՔԿ Նախագահը։ Հիշելով Հովհաննես Շիրազի «Մարգարիտն ու փրփուրը» բանաստեղծությունը՝ Աղվան Հովսեփյանը նկատեց, որ քննիչը ո՛չ մարգարիտն է և ո՛չ էլ փրփուրը, այլ՝ ծովի հատակին մարգարիտներ որոնողը։ «Ես մարգարիտը համեմատում եմ քրեական գործերով ձեռք բերվող ապացույցների հետ. պետք է փնտրեք ու գտնեք իրական ապացույցները»,- ընդգծեց ՀՀ ՔԿ նախագահը։
Մասնագիտական տոնի կապակցությամբ Քննչական կոմիտեին շնորհավորական ուղերձներ են հղել երկրի պետական այրերը, գործընկեր գերատեսչությունների ղեկավարները, Հայաստանում ԱՄՆ դեսպանատունը։ Քննչական կոմիտեի մի շարք աշխատակիցներ արժանացել են պետական և գերատեսչական բարձր պարգևների։ Լուսանկարները՝ Քննչական կոմիտեի պաշտոնական կայքում:
ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժին
.gif)
