Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է Հայաստանի Հանրապետության Առողջապահության նախախար Լևոն Ալթունյանին։
Հանդիպմանն Ամենայն Հայոց Կաթողիկոսը նշանակման առիթով շնորհավորել է նախարարին, հաջողություններ և արդյունավետ առաքելություն մաղթել նրան առողջապահության բարդ և դժվարին ոլորտում:
Նորին Սրբությունը հույս է հայտնել, որ նախարարն ամեն ջանք կներդնի ոլորտի զարգացման ուղղությամբ, նոր ձեռքբերումներով այն կբարձրացնի մի նոր մակարդակի: Ամենայն Հայոց Կաթողիկոսն ընդգծել է, որ Հայոց Եկեղեցին` իր աշխարհասփյուռ թեմերով, ունեցած հնարավորությունների սահմաններում կշարունակի զորակցություն բերել ոլորտի արդյունավորմանը:
Լևոն Ալթունյանը Հայոց Հայրապետին ներկայացրել է առողջապահության զարգացման և առկա խնդիրների հաղթահարման վերաբերյալ իր տեսլականը` վստահեցնելով, որ պիտի ամեն ջանք գործադրի այս պատասխանատու ծառայության մեջ` ի նպաստ հայրենի բնակչության:
Վեհափառ Հայրապետը կարևորել է բժշկական ծառայությունների մատչելիությունը կարիքավորների և հասարակության խոցելի խմբերի համար:
.gif)
