«Կառավարման համակարգն ամբողջությամբ մետաստազների մեջ է. նրանք ոչ թե Հայաստանի շահն են պաշտպանում, այլ Ռուսաստանի»

«Կառավարության ծրագրից որևէ ակնկալիք չկա, մի պարզ պատճառով, որ երբևէ Հայաստանում կառավարություններն իրենց ծրագրերով չեն առաջարկվել և դրա համար պատասխան տվել: Եվ ոչ էլ որևէ մեկն իշխանության մեջ կլինի նախագահ, թե որևէ այլ պաշտոնատար անձ ծրագրերով չէ, որ գործել են և համապատասխան ծրագրերից է, որ իրենց գործունեությունը ծավալել են»: Այս մասին  ArmLur.am-ի հետ զրույցում ասաց  «Ժառանգություն» կուսակցության փոխնախագահ Արմեն Մարտիրոսյան՝ ՀՀ վարչապետ Կարեն Կարապետյանի կողմից ներկայացված կառավարության նոր ծրագրին մասին խոսելով:

Արմեն Մարտիրոսյանի կարծիքով ՝ խոսել ծրագրերի մասին այս դեպքում ճիշտ չէ: «Ցանկացած պարագայում, նույնիսկ այն, ինչ-որ ծրագրում գրված է, հատկապես նրա  գաղափարական հատվածում, դա ևս իրական չէ կամ իրականությունից շատ հեռու է, քանի որ ամենասկզբում խոսում է նրա մասին, որ այն մարտահրավերները, որոնք կան, դրանց համար արագ  բարեփոխումներ են պետք: Բոլորի ներուժն օգտագործելով և՛ Հայաստանում, և՛ սփյուռքում»,-նկատեց նա:

Ըստ նրա՝ ակնհայտ է, որ իշխանությունն ու կառավարությունն մի կողմ են: Եվ այս պարագայում հասարակությունն ու սփյուռքը հեռու են այս կառավարությունից և իշխանությունից:

«Խոսք է գնում ժողովրդի վստահության արժանացած կառավության մասին, այդ դեպքում վարչապետը պետք է ասեր, որ նոր համապետական ընտրություններ են պետք և այդ կառավարությունը պետք է ձևավորվի արդար և թափանցիկ ընտրություններով»,-ընդգծեց  «Ժառանգություն» կուսակցության փոխնախագահը:

Արմեն Մարտիրոսյանը նշեց, որ միևնույն է կառավարության ծրագրով  հեղափոխություն չի լինելու, չնայած, որ կարող են այս մի քանի ամսվա ընթացքում ժողովրդի սիրտը շահեն, որպեսզի կարողանան ընտրություններին նորից վերարտադրվեն: Միևնույնն է խոշոր հաշվով ոչինչ չի փոխվելու:

«Կառավարման համակարգն ամբողջությամբ մետաստազների մեջ է, եթե մի փոքր ուշադիր ենք նայում, ապա տեսնում ենք,  որ նրանք ոչ թե Հայաստանի շահն են պաշտպանում, այլ Ռուսաստանի: Այն առումով, որ նրանց մեջ կան մարդիկ, որ նախկինում եղել են կառավարման համակարգի մեջ և հլու-հնազանդ ծառայել են այս համակարգին: Նաև վարչապետը չանդրադարձավ անգամ Գյումրիի ու Վանաձորի այս խայտառակ ընտրություններին և դրան հետևած առավել խայտառակ իրադարձություններին»,-հավելեց նա:

Լիդա Եղիազարյան