Երևանի քաղաքապետ Տարոն Մարգարյանը որոշել է զբաղվել իր վարկանիշի բարձրացմամբ: Ինչի համար էլ անգամ հատուկ խումբ է ստեղծվել այդ աշխատանքները համակարգելու համար: Նկատենք, որ Տ. Մարգարյանի վարկանիշը «ընկավ» հատկապես 2013 թվականի հուլիսին` տրանսպորտի ուղեվարձի թանկացումների մասին հայտարարություններից հետո:
«Հրապարակ»-ի փոխանցմամբ` քաղաքապետը որոշել է ստեղծել մի խումբ, որը պետք է այնպիսի քայլեր մտածի, որոնցով հնարավոր կլինի բարձրացնել քաղաքապետի վարկանիշը: Նրա հեղինակության բարձրացմամբ զբաղվող խորհուրդը պետք է ելքեր գտնի, որպեսզի Տարոն Մարգարյանը կարողանա դուրս գալ ստեղծված բարդ իրավիճակից: Այս առումով էլ հետաքրքրություն է ներկայացնում հենց խորհրդի կազմը: Այն կազմված է իրենց ոլորտում փորձառու մարդկանցից:
1. Շուշան Սարդարյան – ՀայՌուսգազարդի մամլո խոսնակ
2. Մարիա Բարաղամյան – Քաղաքապետարանի մշակույթի եւ տուրիզմի վարչության բաժնի պետ
3. Մարգարիտ Եսայան – ԱԺ ՀՀԿ խմբակցության պատգամավոր
4. Նարեկ Մալյան – Ոստիկանապետ Վովա Գասպարյանի օգնական
5. Արթուր Գեւորգյան – Քաղաքապետարանի հասարակայնության հետ կապերի վարչության պետ
6. Նաղաշ Մարտիրոսյան – ԵՊՀ ժուռնալիստիկայի ֆակուլտետի դեկան
7. Արամ Անանյան – «Արմենպրես» լրատվական գործակալության տնօրեն
8. Շավարշ Գեւորգյան – Հ2-ի լրատվական ծրագրի ղեկավար
9. Աստղիկ Ավետիսյան – «Հայկական Փի Ար ասոցիացիա» գիտահետազոտական ՀԿ նախագահ
10. Էլզա Մանուկյան – Արարատյան թեմի էլեկտրոնային քարոզչության պատասխանատու
11. Գ. Դաջունց – «Գելափ ինթերնեյշնլ ասոցիացիա» ընկերության հետազոտական բաժնի ղեկավար
12. Տիգրան Քոչարյան – «Հայաստանի գիտակների ասոցիացիա» ՀԿ ղեկավար
13. Անահիտ Եսայան – Նարեկ Սարգսյանի մամլո խոսնակ
14. Մ. Դավթյան – «Առողջություն» հաղորդաշարի պրոդյուսեր
15. Սոնա Տռուզյան – ՀՀ նախկին գլխավոր դատախազ Աղվան Հովսեփյանի նախկին մամլո խոսնակ
16. Սամվել Մարտիրոսյան – Տեղեկատվական անվտանգության փորձագետ
Խորհրդի հետագա անելիքների և ստեղծված իրավիճակում Տարոն Մարգարյանի վարկանիշի բարձրացման հնարավորության մասին armlur.am-ը զրուցեց ԱԺ ՀՀԿ խմբակցության պատգամավոր, խորհրդի անդամ Մարգարիտ Եսայանի հետ:
– Տիկին Եսայան, խորհրդի կազմում ընդգրկվել եք Ձեր ցանկությամբ, թե՞ Ձեզ առաջարկել են:
– Ոչ, ինձ առաջարկել են քաղաքապետարանից և ես սիրով ընդունել եմ այդ առաջարկը: (Նշենք, որ քաղաքապետարանի լրատվության վարչության պետ Արթուր Գևորգյանը «Հրապարակ»-ի հետ զրույցում նշել էր, թե իրենք խորհուրդ ստեղծելու մասին հայտարարել են, ինչին էլ արձագանքել են նշված անձինք և ցանկություն հայտնել ընդգրկվել խորհուրդում, այլ ոչ թե իրենք են առաջարկել):
– Ինչպե՞ս եք պատրաստվում բարձրացնել քաղաքապետի հեղինակությունը:
-Ես իմ անձնական նպատակներն ունեմ: Առաջին աշխատանքային հանդիպումն առաջիկայում կանենք: Դրանից հետո միայն ես ավելի մանրամասն կկարողանամ ասել, թե իմ առաջարկներից որ մասն ընդունվեց, որ մասը չընդունվեց: Բայց այն հիմնականում հասարակական հիմունքներով գործող կառույց է լինելու ու ավելի շատ խորհրդատվական պիտի լինի: Ուղղակի շատ ողջունելի է քաղաքապետի այս նախաձեռնությունը, որովհետև ինքը նաև մեր միջոցով ցանկանում է լուծել հասարակության կարծիքը, հասարակության տրամադրությունները:
– Սակայն ուղեվարձի թանկացման փորձից հետո նրա վարկանիշը կտրուկ անկում է ապրել: Ելքը ո՞րն է:
– Անկեղծ ասած դա ձեր կարծիքն է, որ Տարոն Մարգարյանի հեղինակությունը շատ ցածր է: Ես հակառակ կարծիքին եմ, ընդհակառակը` այսօր գործող քաղաքապետի հեղինակությունը շատ բարձր է և շատ գնահատում եմ իր կատարած աշխատանքը: Գտնում եմ, որ շատ հասարակական կազմակերպություններ, որոնք վճարվում են դրսից և այլ շահեր են հետապնդում, տեսնեին շատ իրատեսորեն, լայն բացված աչքերով տեսնեին այն կոնկրետ աշխատանքը, որն իրականացնում է այսօր Երևանի քաղաքապետը: Շատ բարձր եմ գնահատում նրա աշխատանքն իրականում:
– Տարոն Մարգարյանին չարաշահումների մեջ են մեղադրում: Վերահսկիչ պալատի հաշվետվության մեջ այդ մասին նույնպես նշված է:
– Չարաշահումները կոնկրետ փաստերով են լինում, իսկ Վերահսկիչ պալատի հաշվետվության մեջ ներկայացված փաստերը չարաշահումներ չեն: Վերահսկիչ պալատը տարբեր կառույցների հետ կապված ստուգումներ է իրականացնում և կառույցները հարմար պահի, օրենքի սահմաններում պատասխանում և ներկայացնում են իրենց փաստերը: Դրանք չարաշահումներ չեն:
Նաիրա Հովհաննիսյան
.gif)
