ArmLur.am-ն ավելի վաղ հաղորդել էր, սեպտեմբերի 16-ին Մասիսում ինքնասպանության փորձի դեպք էր գրանցվել: «Թունավորում սնդիկի միացությամբ» ախտորոշմամբ հիվանդանոց էին տեղափոխվել Մասիս քաղաքի բնակիչներ՝ 1980 թ. ծնված Շ. Թումանյանը և նրա 4-ամյա դուստրը։
2015թ. սեպտեմբերի 16-ին՝ ժամը 08:00-ի սահմաններում, Շ. Թումանյանն իր ննջասենյակում ինքնասպան լինելու համար խմել է սնդիկի հիդրօքսիդ, բացի այդ, ներարկիչի միջոցով սնդիկի հիդրօքսիդ է խմեցրել իր անչափահաս 4-ամյա դստերը։ Պարզվել է սնդիկի հիդրօքսիդի ձեռքբերման աղբյուրը. այն Շ. Թումանյանն իր տուն է բերել նախկին աշխատավայրից՝ Մասիս քաղաքի միջնակարգ դպրոցի լաբորատորիայից։
Կնոջն ու նրա 4-ամյա դստերը բժշկական կենտրոն են տեղափոխել տանը գտնվող նրա ընտանիքի անդամները։ Դեպքի վայրի զննության ժամանակ Շ. Թումանյանի ննջասենյակից հայտնաբերվել և առգրավվել է երկու ապակե տարա, որոնցից մեկի մեջ եղել է գազարագույն փոշենման նյութ, իսկ մյուսի մեջ՝ արծաթագույն նյութ, առգրավվել է նաև մեկ նարնջագույն ներարկիչ, որի վրա առկա է եղել գազարագույն փոշենման նյութ և թեյի բաժակ, որի ներսի հատվածը քայքայված է եղել ինչ-որ նյութի ազդեցությունից:
Դեպքի առթիվ ՀՀ քննչական կոմիտեի Արարատի մարզային քննչական վարչության Մասիսի քննչական բաժնում սեպտեմբերի 16-ին հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 1-ին մասի հատկանիշներով (սպանության փորձ): Նախաքննության ընթացքում նշանակվել են դատաբժշկական, դատանյութագիտական փորձաքննություններ, հարցաքննվել են մի շարք վկաներ:
Ինչպես հայտնի է` ամուսնալուծվելուց հետո Շ. Թումանյանը 4-ամյա դստեր հետ ապրել է Մասիսում գտնվող հայրական տանը:
Եվ ահա, դատարանում կինը հայտնել է, որ ցանկացել է ինքնասպան լինել և չի ցանկացել, որ դուստրն իր մահից հետո որբ մեծանա: Իր անմարդկային քայլը 36-ամյա կինն այդպես է բացատրել:
Հետագայում պարզ է դարձել, որ կինը տառապում է շիզոֆրենիա հիվանդությամբ և արարքը կատարելիս չի գիտակցել դրա լրջությունը:
Ուսումնասիրելով փաստերը` դատարանը որոշել է կնոջն անմեղսունակ ճանաչել և ազատել քրեական պատասխանատվությունից: Փոխարենը նրա նկատմամբ որոշվել է կիրառել հարկադիր բուժում:
.gif)
