Սպասված այց՝ անակնկալ արդյունքով

Սպասված այց՝ անակնկալ արդյունքով

Արագածոտնի մարզի Կաթնաղբյուր գյուղի կիսակառույցներից մեկն ընդգրկվել է ՎիվաՍել-ՄՏՍ-ի ֆինանսավորմամբ և «Ֆուլեր Տնաշինական Կենտրոնի» կողմից իրականացվող բնակարանաշինության 2017 թվականի ծրագրում: Տանտիրոջ՝ հիսուներկուամյա Հայկ Բաղդասարյանի և ընտանիքի համար, ուսումնասիրություների նպատակով կազմակերպված հերթական շրջայցն ավարտվել է հաճելի անակնկալով: Ծրագրի պահանջներին համապատասխանությունից ելնելով՝ ընտանիքին հայտարարվել է շահառու դառնալու մասին:

Բաղդասարյանների տան հիմքերը փորվել են քսան տարի առաջ, երբ նրանք լիահույս էին, որ շինարարությունն ավարտին հասցնելը բարդ գործ չի լինելու: Մինչև օրս, տանտիրոջը հաջողվել է կառուցել շինության պատերն ու այն մասամբ պաշտպանել ծածկով: Կանգ առած շինարարության պատճառով, կիսակառույցը տուն դարձնելը երազանքներից այն կողմ չի անցել: Երկու տասնամյակ, Հայկի ընտանիքը՝ կինն ու հասուն երեք որդիները, ստիպված են եղել ապրել նախ՝ Հայկի հայրական տանը, ապա՝ վարձով, համագյուղացու կիսավեր բնակարանում: Մեծ որդին՝ Արգիշտին, ծառայում է Հայոց բանակում՝ Մարտակերտում: Մյուս երկուսը դպրոցական են:

Հարյուրից ավելի ընտանիքի երջանկություն պարգևած գործընկեր կառույցները հերթական ընտանիքին վաղվա օրվա նկատմամբ վստահություն են ներշնչել: Բաղդասարյանների երազանքների տունը մինչև տարեվերջ կկառուցվի:

«Անսահման ուրախ եմ: Վաղուց այսպիսի լավ լուր չէի լսել: Ամբողջ կյանքում և՛ ես, և՛ կինս ու որդիներս ծանր ու քրտնաջան աշխատել ենք՝ մեր տան շինարարությունն ավարտելու համար, սակայն ապարդյուն: Հազիվ կարողացել ենք հոգալ առօրյա հոգսերը: Այսօր երջանիկ օր է մեզ համար»,-ասել է ընտանիքի հայրը՝ Հայկը:

«Բնակարանաշինության ծրագիրն աջակցում է ցածր եկամուտ ունեցող ընտանիքներին՝ կառուցել ու վերանորոգել իրենց բնակարանը: Քանի որ Հայաստանում տան խնդիր ունեցող ընտանիքների թիվը մեծ է, մենք ստիպված ենք լինում ընտրություն կատարել. այցելում ենք, ուսումնասիրում, գնահատում կարիքի աստիճանը, ապա՝ ընտրված ընտանիքների հետ սկսում ենք շինարարական աշխատանքներն ու մինչև տարեվերջ ավարտին հասցնում դրանք:

Ուրախ եմ այս ընտանիքի համար, ինչպես նաև այն բոլոր ընտանիքների, որ այս տարեվերջին բարեկարգ բնակարան կունենան` ՎիվաՍել-ՄՏՍ-ի ու «Ֆուլեր Տնաշինական Կենտրոնի» համագործակցության արդյունքում»,-ասել է կազմակերպության նախագահ Աշոտ Եղիազարյանը: