Ես չեմ հասկանում, մենք նախագահ ունե՞նք, թե՞ Սերժը մեռել է. բնակիչ (տեսանյութեր)

Արդեն մի քանի ամիս է` Սայաթ-Նովայի 10-12 հասցեներում կատարվող ապօրինի շինարարության դեմ են  պայքարում այդ հասցեի բնակիչները:

Շինարարությունը կատարվում է  բավականին արագ տեմպերով. պատասխանատուն  «Լարկո գրուպ» ընկերությունն է, որի սեփականատիրոջը, ինչպես հայտնեցին  բնակիչները  Armlur.am -ի թղթակցի հետ զրույցում, այդպես էլ չեն տեսել:  Նրանք վստահ են, որ իրականում «Լարկո գրուպի» սեփականատիրոջ հետևում իշխող կուսակցության ներկայացուցիչներից մեկն է:

Սայաթ-Նովայի 10/5 շենքի բնակիչ, ազգագրագետ Անդրանիկ սարկավագ Մանուկյանն էլ  հանգել է այն եզրակացության, որ  «Լարկո գրուպի» հետևում կանգնած է ՀՀ նախագահի աշխատակազմը: «Թե հիմա դա Վիգեն Սարգսյանն է,  թե  մեկ ուրիշը աշխատակազմից, թող իրենք իրենց մեջ որոշեն»,- ասաց սարկավագը:

Փորձեցինք կապ հաստատել նաև  ՀՀ նախագահի աշխատակազմի ղեկավար Վիգեն Սարգսյանի  հետ` պարզաբանում ստանալու առնչությամբ, սակայն հեռախոսազանգերը մնացին անպատասխան:

Մեր թղթակցի հետ զրույցում բնակիչները վրդովված ասացին, որ այս շինարարության պատճառով փակվում է իրենց արևի լույսը, ամբողջ փոշին ու ավազը լցվում բնակարանները, որի պատճառով առողջապահության նախարարությունը  տուգանել է ընկերությանը: «Ես չեմ հասկանում, մենք նախագահ ունենք, թե Սերժը մեռել է: Սա ինչ բան է, մեզ մրջյունի նման տրորում են, մարդ չի կարողանում իր տան մեջ  հանգիստ ապրել»,-վրդովված ասում էին  բնակիչները:

Զրուցեցինք նաև «Լարկո գրուպ» ընկերության ներկայացուցիչներից մեկի հետ, ով ասաց, որ  շինարարությունն օրինական է,  քանի որ կա շինթույլտվություն: Մեր դիտարկմանը, թե բնակիչները դեմ են  շինաշխատանքներին և բողոքում են, նա ասաց, որ բնակիչները միշտ էլ բողոքում են:

«Լարկո գրուպ» ընկերության ներկայացուցչի հետ զրույցը դիտելու համար սեղմեք այս հղումը ՝   Այս ամենի հետևում կանգնած է ՀՀ նախագահի աշխատակազմը:

Մանրամասները ՝  տեսանյութերում:

Սոնա Դավթյան