Դեկտեմբերին կորոշվի Վրաստանի եվրոպական ապագան. Ղարիբաշվիլին շնորհակալություն է հայտնել Մակրոնին և նրան հրավիրել Վրաստան

Փարիզում Վրաստանի վարչապետ Իրակլի Ղարիբաշվիլին հանդիպել է Ֆրանսիայի նախագահ Էմանուել Մակրոնի հետ։

Հանդիպման մասին տեղեկացրել է Վրաստանի կառավարության մամուլի ծառայությունը։

Ֆրանսիայի նախագահը Ելիսեյան պալատում ընդունել է Վրաստանի կառավարության ղեկավարին։

Ըստ մամուլի ծառայության՝ հանդիպման ժամանակ քննարկվել է Եվրահանձնաժողովի ընդունած որոշումը՝ դրական հանձնարարական տալ Եվրախորհրդին՝ Վրաստանին ԵՄ անդամակցության թեկնածուի կարգավիճակ տրամադրելու վերաբերյալ։

Կառավարության ղեկավարը նշել է, որ Եվրահանձնաժողովի այս որոշումը պատմական է։ Դեկտեմբերին Վրաստանը սպասում է թեկնածուի կարգավիճակին, որը կորոշի երկրի եվրոպական ապագան։

Իրակլի Ղարիբաշվիլին շնորհակալություն է հայտնել Էմանուել Մակրոնին այս ճանապարհին ցուցաբերած աջակցության համար, ընդգծել Ֆրանսիայի՝ որպես ԵՄ առաջատար երկրի քաղաքական և գործնական աջակցության կարևորությունը և հույս հայտնել, որ այն ավելի կամրապնդվի, ինչը կօգնի Վրաստանին հաջողությամբ անցնել անդամակցության հաջորդ փուլ։

Հանդիպմանը Իրակլի Ղարիբաշվիլին և Էմանուել Մակրոնը քննարկել են երկու երկրների համագործակցության հարցերը և դիտարկել տարբեր ոլորտներում այն խորացնելու հեռանկարները։

Զրույցի ընթացքում անդրադարձ է եղել նաև տարածաշրջանում և աշխարհում տիրող անվտանգային իրավիճակին։

Կողմերը քննարկել են առկա մարտահրավերները լուծելու ուղիները՝ խոսելով այն դրական դերի մասին, որ Վրաստանը կարող է խաղալ Հարավային Կովկասում անվտանգության և կայունության ապահովման գործում։

Իրակլի Ղարիբաշվիլին շնորհակալություն է հայտնել Էմանուել Մակրոնին՝ Վրաստանի ինքնիշխանության, տարածքային ամբողջականության և եվրոպական ապագայի նկատմամբ ցուցաբերած աջակցության համար և նրան հրավիրել Վրաստան։