Ինչո՞ւ պիտի հեռացնեին ՀՀԿ-ական կարկառուն ռեկտորին

ՀՀ կրթության և գիտության նախարար Արմեն Աշոտյանի հրամանով ` 2014թ. մարտի 18-ից կդադարեցվեն «Հայաստանի պետական ճարտարագիտական համալսարան (Պոլիտեխնիկ)  պետական ոչ առևտրային կազմակերպության ռեկտոր Արա Սերգեյի Ավետիսյանի լիազորությունները ռեկտորի պաշտոնում ` լուծելով 2011 թ. հուլիսի 25-ին կնքված թիվ 113 աշխատանքային պայմանագիրը `  նրա դիմումի համաձայն:

Հիշեցնենք, որ համալսարանի մի խումբ դասախոսներ ՀՊՃՀ ֆիզիկայի ամբիոնի վարիչ  Աշոտ Խաչատրյանի գլխավորությամբ ամիսներ շարունակ  բարձրաձայնում էին   պոլիտեխնիկի բյուջեի գումարների անարդյունավետ ծախսման մասին ու պահանջում Արա Ավետիսյանի հրաժարականը: Այս առնչությամբ Armlur.am լրատվականի թղթակիցը զրուցեց Աշոտ Խաչատրյանի հետ:

–Պրն Խաչատրյան,  սպասելի՞ էր, որ Արա Ավետիսյանը հրժարական կտա: Փաստորեն ձեր պայքարն արդյունք տվեց:

-Սպասելին կդժվարանամ ասել, բայց որ պահանջարկված էր իր հրաժարականը կոլեկտիվի կողմից, դա հաստատ է: Մենք  գոհ ենք, որ կայացվեց արդարացի որոշում: Ցավոք սրտի, հաստատվեցին մեր կասկածները, որ ռեկտորն անարդյունավետ է ծախսել  համալսարանի բյուջեի գումարները: Արա Ավետիսյանը  բարեփոխումների անվան տակ  փորձում էր կոծկել բուհի ֆինանսական խնդիրները: Եթե նախագահի վերահսկողական ծառայությունը  չբացահայտեր, որ խախտումներ են եղել…  հավանաբար շատ լուրջ հարցադրումներ են դրել Ավետիսյանի առաջ:

-Այսինքն `  Դուք ընդունում եք, որ  Ավետիսյանն հեռացավ ոչ թե այն պատճառով, որ Դուք դժգոհ էիք նրանից, այլ  նախագահի վերահսկողական ծառայությունը լուրջ խախտումներ է հայտնաբերել:

-Գիտեք, մեկը մյուսի հետ փոխկապակցված է: Մենք Արա Ավետիսյանի անձի դեմ չենք պայքարել:

-Շրջանառվող լուրերի համաձայն ` Արա Ավետիսյանը իշխանության հետ ունեցել է  լուրջ տարաձայնություններ, որի պատճառով էլ նրան հեռացրել են ռեկտորի պաշտոնից:

-Չէ, չեմ կարծում: Անկեղծ ասած, չեմ ուզում մեկնաբանել  այդ լուրերը, բայց ինչո՞ւ պիտի նման բան լիներ: Ես նման բան չեմ լսել: Արա Ավետիսյանը ՀՀԿ կարկառուն դեմքերից է, միշտ մասնակցել է ՀՀԿ նիստերին:

-Տեղյա՞կ եք, որ որքան գումար է անարդյունավետ ծախսել Արա Ավետիսյանը:

-Հաստատ թիվ չեմ կարող ասել, բայց շրջանառվող լուրերի համաձայն մի քանի  100 մլն դրամի մասին է խոսքը:

-Պրն Խաչատրյան,Դուք մեկն եք այն մարդկանցից, որն աչք է ունեցել ռեկտորի պաշտոնի  վրա և իրականում այդ պաշտոնի համար է պայքարել Ավետիսյանի դեմ, ավելին ` ասում են ժամանակին առաջադրել եք ձեր թեկնածությունը այդ պաշտոնի համար:

-Նման բան չկա ՝ դա սուտ է: Ես հիմա էլ չեմ պատրաստվում առաջադրել իմ թեկնածությունը: Ես իմ և պոլիտեխիկի միջավայրի բարելավման, մարդկանց «չքցելու», կառուցողական գործունեության  համար եմ պայքարել:

-Հավանական համարո՞ւմ եք, որ բացի Ավետիսյանից, հրաժարական կտան նաև բուհում իր մերձավոր շրջապատի անդամները:

-Չեմ բացառում: Բայց Արա Ավետիսյանի գալու հետ մեկտեղ նաև լավ կադրեր են եկել:

 -ԿԳ նախարար Արմեն Աշոտյանի հրամանով ժամանակավոր պաշտոնակատար  է նշանակվել ԵՊՃՇՀ արդեն նախկին ռեկտոր, պրոֆեսոր Հովհաննես Թոքմաջյանը: Ի՞նչ ակնկալիքներ ունեք նրանից:

-Անկեղծ ասած, կային խոսակցություններ պրն Թոքմաջյանի  նշանակման մասին:  Համոզված եմ `  Թոքմաջյանն էլ կդառնա մեր բուհի ռեկտոր: Ակնկալիքներս մեծ են, քանի որ Թոքմաջյանը փորձառու  անձնավորություն է և իր ռեկտոր եղած ժամանակ ճարտարապետական համալսարանը լավ արդյունքներ է գրանցել:

Սոնա Դավթյան