ՏԵՍԱՆՅՈՒԹ․ Տարբեր զենքերից կրակոցներ Լենինգրադյան փողոցի շենքի բակում․ ArmLur.am-ը դեպքի վայրում է

ArmLur.am-ը այս պահին Լենինգրադյան փողոցում է, որտեղ քիչ առաջ աննախադեպ կրակոցներ են հնչել տարբեր զենքերից։

ՆԳՆ-ից հայտնել էին, որ ըստ ստացված ահազանգի՝ Հասրաթյան փողոցում լսվել են կրակոցի ձայներ։ Այս պահի դրությամբ տուժածների վերաբերյալ ահազանգեր չկան։ ՆԳՆ ոստիկանության ծառայողներն օպերատիվորեն պարզել են միջադեպի մասնակիցների շրջանակը։ Ձեռնարկում են համապատասխան միջոցառումներ՝ տեղի ունեցածի բոլոր հանգամանքները պարզելու ուղղությամբ։

Լենինգրադյան փողոցի հայտնի «պոչտայի շենքի» մոտ ականատեսները լսել են կրակոցի ձայներ։ Տարածքը անմիջապես փակվել է ոստիկանության կողմից, իսկ ամբողջ ճանապարհահատվածը այս պահին արգելափակված է։

Իրավապահները դեպքի վայրում են և փորձում են պարզել կրակոցների հանգամանքներն ու մանրամասները։ ArmLur.am-ի տեղեկություններով՝ իրավապահները արդեն հետքի վրա են դուրս եկել։

Shamshyan.com-ն էլ դեպքի վայրից հայտնում է, որ իրավապահները նշված շենքի բակում հայտնաբերել են տարբեր զինատեսակներից կրակված պարկուճներ՝ ատրճանակի և ինքնաձիգի։ Այս պահին քրեական և համայնքային ոստիկաններն ու պարեկները պարզում են՝ արդյոք կրակոցների հետևանքով կան տուժած կամ տուժածներ։

Մի քանի խմբեր մեկնել են Երևանի տարբեր հիվանդանոցներ՝ պարզելու դա։

Դեպքի մասին Երևանի քրեական ոստիկանությունից տեղեկությունը փոխանցել են ՀՀ քննչական կոմիտեի Երևան քաղաքի քննչական վարչության Աջափնյակ և Դավիթաշեն վարչական շրջանների քննչական բաժին, որտեղից արդեն ժամանել է քննչական խումբը և ՀՀ քննչական կոմիտեի փորձաքննագետը։

Քնար Մանուկյան

Մանրամասները՝ տեսանյութում․