Իսպանական իշխանությունների տվյալներով՝ վերջին 24 ժամվա ընթացքում մոտ 49 հազար ներգաղթյալ Մարոկկոյից մուտք է գործել Իսպանիային պատկանող Սեուտա քաղաք՝ անցնելով ծովով և ցամաքով։
Ներգաղթյալների զանգվածային հոսքի ֆոնին Սեուտա է ժամանում Իսպանիայի վարչապետ Պեդրո Սանչեսը։ Ոստիկանությունը հայտնել է, որ դեռևս շատ մարդիկ շարունակում են հասնել քաղաք։
Իսպանական իշխանությունները հայտարարել են, որ փորձելու են հնարավորինս արագ արտաքսել անօրինական մուտք գործած անձանց, թեև վերջերս դատարանի որոշմամբ սահմանափակումներ են մտցվել արագ արտաքսումների վերաբերյալ։
Սոցիալական ցանցերում տարածված տեսանյութերում երևում է, թե ինչպես են ներգաղթյալները քայլում Սեուտայի փողոցներով՝ բղավելով՝ «Ցտեսություն, Մարոկկո, բարև, Իսպանիա»։ Ոստիկանության և քաղաքացիական գվարդիայի աշխատակիցները հիմնականում փորձել են ուղղորդել նրանց դեպի ընդունման կենտրոններ։
Միգրացիոն ճգնաժամը դառնում է դիվանագիտական խնդիր
Սեուտայում ստեղծված իրավիճն արդեն առաջացրել է քաղաքական լարվածություն։ Իտալիան կոչ է արել ժամանակավորապես դադարեցնել Իսպանիայի մասնակցությունը Շենգենյան ազատ տեղաշարժի գոտուն, ինչից հետո Մադրիդը կանչել է Իտալիայի դեսպանին՝ մեղադրելով Հռոմին ճգնաժամը քաղաքական նպատակներով օգտագործելու մեջ։
Ֆրանսիայի ներքին գործերի նախարար Լորան Նյունեսը հայտարարել է, որ Իսպանիայի հետ սահմանին ուժեղացվելու են վերահսկողության միջոցառումները՝ Սեուտայում ստեղծված իրավիճակի պատճառով։
Իսպանական լրատվամիջոցների տվյալներով՝ իշխանությունները հայտնվել են ծանր իրավիճակում և չեն կարողացել լիարժեք վերահսկել ներգաղթյալների հոսքը։ Ըստ տեղեկությունների՝ ճգնաժամի սկզբում սահմանային հատվածում եղել է ընդամենը 55 իրավապահ։
Սա Սեուտայում 2021 թվականից ի վեր ամենախոշոր ներգաղթյալների հոսքն է։ Նրանց մեծ մասը երիտասարդ տղամարդիկ և դեռահասներ են։ Իշխանությունների տվյալներով՝ սահմանը հատելու փորձերի ընթացքում զոհվել է առնվազն 18 մարդ։
Մոտ 83 հազար բնակչություն ունեցող Սեուտայի բնակչության թիվը ներգաղթյալների մուտքի հետևանքով աճել է շուրջ 50 տոկոսով։
Անի Վարդանյան
.gif)
