Թրամփը Կանադային կոչ է արել իր ընկերությունների գլխավոր գրասենյակները տեղափոխել ԱՄՆ

ԱՄՆ նախագահ Դոնալդ Թրամփը հերթական անգամ սրել է Կանադայի հետ առևտրային հակամարտությունը՝ կանադական ընկերություններին կոչ անելով իրենց գլխավոր գրասենյակներն ու արտադրական օբյեկտները տեղափոխել ԱՄՆ։

«Թող բոլոր կանադական ընկերությունները, որոնք գործարքներ են կնքում Ամերիկայի հետ, տեղափոխվեն Միացյալ Նահանգներ։ Երբ վերադառնաք, մաքսատուրքեր չեն լինի», – գրել է Թրամփը Truth Social-ում։

Նա միաժամանակ Կանադային անվանել է ԱՄՆ-ի «ամենավատ» առևտրային գործընկերներից մեկը՝ հայտարարելով, որ չի ցանկանում կանադական մեքենաներ, պահեստամասեր և այլ ապրանքներ։ ԱՄՆ-ի և Կանադայի միջև տարեկան իրականացվում է մոտ 900 միլիարդ դոլարի տնտեսական գործունեություն։

Կանադացի պաշտոնյաները քննադատել են Թրամփի քաղաքականությունը։ Օնտարիոյի վարչապետ Դուգ Ֆորդը հայտարարել է, որ առևտրային պատերազմը վնասելու է երկու երկրների տնտեսություններին։ Նա նաև ծաղրել է Թրամփի որոշումը՝ Օնտարիո լիճը «Ամերիկա լիճ» անվանելու մասին՝ ընդգծելով. «Ոչ ոք այն Ամերիկա լիճ չի անվանելու»։

ԱՄՆ-ի և Կանադայի միջև առևտրային բանակցությունները ձախողվել են։ Թրամփը կանադական մի շարք ապրանքների նկատմամբ հայտարարել է մինչև 50% մաքսատուրքեր, իսկ Կանադան պատասխան մաքսատուրքեր է սահմանել ամերիկյան արտադրանքի նկատմամբ։

ԱՄՆ առևտրային ներկայացուցիչ Ջեյմիսոն Գրիրը զգուշացրել է, որ Կանադայի կողմից հետագա պատասխան քայլերը կարող են նոր արձագանքի արժանանալ Վաշինգտոնի կողմից։