Հուլիսի 24-ին ԱԻՆ փրկարար ծառայության հատուկ հրշեջ ջոկատի անդամներն անցկացրեցին ուսումնական գործնական պարապմունք:Պարապմունքի պլանով նախատեսված էր հրդեհաշիջման աշխատանքներ իրականացնել խոշոր հրդեհի ժամանակ` մի քանի մարտական հաշվարկի ներգրավմամբ: Հրդեհաշիջման աշխատանքներին զուգահեռ հրշեջ-փրկարարները իրականացնում էին նաև այրվող շինության բարձր հարկերից հատուկ տեխնիկայի միջոցով քաղաքացիների տարհանման աշխատանքներ, տուժածներին ցուցաբերվում էր առաջին օգնություն:
Պարապմունքի հիմնական նպատակն էր խոշոր հրդեհների ժամանակ ապահովել հրշեջ- փրկարարական տարբեր հաշվարկների միջև փոխհամաձայնեցված գործողությունների իրականացումը, ինչպես նաև հրդեհի մարման աշխատանքների ժամանակ մեկ կենտրոնից իրականացնել բոլոր մարտական հաշվարկների ընդհանուր ղեկավարումը: Հատուկ հրշեջ ջոկատի գործնական պարապմունքին հետևում էին ԱԻՆ փրկարար ծառայության տնօրենի տեղակալ գեներալ-մայոր Վրեժ Գաբրիելյանը, Փրկարար ուժերի վարչության պետ, գնդապետ Պավել Գյոզալյանը:
Հրդեհաշիջման համար նախատեսված հատուկ կռունկների օգնությամբ հրշեջ-փրկարարները շինության տարբեր բարձրություններում իրականացրեցին հրդեհի մարման աշխատանքներ, ստացված հրահանգից հետո ջրի շիթերը տարբեր ռեժիմներով միաժամանակ ուղղելով հրդեհի միևնույն օջախին: Հրդեհի վերջնական մարումից հետո հրդեհաշիջման շտաբն ամփոփեց արդյունքները:
.gif)
