Սոչիում կայացած եռակողմ հանդիպումից հետո հայկական լրատվամիջոցներից մեկին տված հարցազրույցում, ի թիվս այլ հարցերի, Սերժ Սարգսյանն անդրադարձել է նաև սահմանային վերջին միջադեպերի կապակցությամբ ՀԱՊԿ դիրքորոշմանը, կամ ավելի ճիշտ` դրա բացակայությանը:
Հարցին, թե ինչու ՀԱՊԿ-ն այդպես էլ չարձագանքեց, Սերժ Սարգսյանը տվել է խիստ ուշագրավ պատասխան. «Ես կարծում եմ` դրա անհրաժեշտությունը չկար: ՀԱՊԿ-ի գործողությունները մշտապես պայմանավորված են լինում դիմող երկրի գործողություններո»,- նշել է նա` անմիջապես, սակայն, հավելելով. «Իհարկե, ՀԱՊԿ-ը կարող էր արձագանքել, և կարող էր սա զուտ տեխնիկական խնդիրներով պայմանավորված լինել: Որքանով ես տեղյակ եմ` ՀԱՊԿ-ի գլխավոր քարտուղարը մոտ ժամանակներս պիտի այցելի Հայաստան: Սա արդեն վերաբերմունք է: Եվ երկրորդ` դուք հնարավորություն կունենաք այս հարցերը նրան ուղղելու»:
Թե ինչ տեխնիկական խնդիրներ նկատի ունի Սարգսյանը, հասկանալի չէ: Ինչպես և առնվազն տարակուսելի է նրա այն պնդումը, թե ՀԱՊԿ-ի գլխավոր քարտուղարի առաջիկա այցելությունը Հայաստան արդեն իսկ վերաբերմունք է:
Հիշեցնենք, որ տարիներ շարունակ Նիկոլայ Բորդյուժան նախանձելի պարբերականությամբ էր այդպիսի «վերաբերմունք» դրսևորում` առավելապես պայմանավորված այն հանգամանքով, թե ինչպիսի ճոխությամբ հյուրասիրություն էր կազմակերպում ԱԱԽՔ նախկին քարտուղար Արթուր Բաղդասարյանը: Ուստի` առաջիկա այցը սահմանային միջադեպերի հետ կապելը ինքնախաբեության պես մի բան է, ինչը, սակայն, Սերժ Սարգսյանը շատ լավ գիտակցելով` խորհուրդ է տալիս լրագրողին` դիմել Բորդյուժային և պարզել ՀԱՊԿ-ի լռության պատճառը:
Այսինքն` չցանկանալով կամ անիմաստ համարելով ՀՀ իշխանությունների կողմից այդ հարցի բարձրացումը` Սերժ Սարգսյանն այդ պարտականությունը դնում է լրատվամիջոցների ուսերին: Սա ինքնին բավականին խոսուն կերպով ցույց է տալիս ՀԱՊԿ-ի հետ կապվող հույսերի անլրջության աստիճանը:
Շարունակելով թեման` Ս. Սարգսյանն այդուհանդերձ փորձում է փրկել դեմքը` ընդգծելով. «Իրոք, ես համոզված եմ, դրա անհրաժեշտությունը չկար: Եթե որևէ մեկը մտածում է, որ եթե ՀԱՊԿ-ը արձագանքեր, ապա ադրբեջանցիներն անմիջապես կդադարեցնեին (կրակոցները ), ապա կարծում եմ, որ նա սխալվում է»:
Սա արդեն իրավիճակի ընկալման միտումնավոր խեղաթյուրում է, քանզի հենց նույն Սերժ Սարգսյանի համար էլ ակնհայտ է, որ գոնե այս փուլում հայտարարության տեսքով ՀԱՊԿ-ի միջամտությունն անհրաժեշտ էր ոչ թե ադրբեջանցիների սադրանքներին վերջ դնելու, այլ Հայաստանի անվտանգության երաշխիքների ամրությունն ի ցույց դնելու և հենց դրանով Ադրբեջանի վրա ազդեցություն գործելու համար: Սակայն, թերևս, դժվար է ի ցույց դնել մի բան, որը գոյություն չունի: Սա արդեն ակնհայտ է բոլորի, եվ առաջին հերթին` լրագրողների միջոցով ՀԱՊԿ-ից պատասխան պահանջող Ս. Սարգսյանի համար:
.gif)
