Արմավիրի մարզի աշակերտներն այցելել են Ծիծեռնակաբերդ և Եռաբլուր

Արմավիրի մարզի տարբեր գյուղերի շուրջ 50 աշակերտ նոյեմբերի 6-ին իրենց պատմության ուսուցիչների հետ «Մարզային նախաձեռնությունների և զարգացման ծրագրերի կենտրոն» ՀԿ-ի նախաձեռնությամբ այցելել էին Հայոց ցեղասպանության զոհերի հուշահամալիր և «Եռաբլուր» պանթեոն։

Ծրագիրն իրականացվում է ՀՀ նախագահի գործընկեր կազմակերպության՝ Հայաստանի երիտասարդական հիմնադրամի հայտարարած դրամաշնորհային մրցույթի շրջանակներում։

Հայոց ցեղասպանության ինստիտուտ-թանգարանի փոխտնօրեն Սուրեն Մանուկյանն աշակերտներին ծանոթացրեց հուշահամալիրի կառուցման պատմությանը, Հայոց ցեղասպանության ինստիտուտ-թանգարանին, Ցեղասպանության միջազգային ճանաչման գործընթացին, անդրադարձավ այլ թեմաների։

Խոսելով Հիշողության ծառուղուց դեպի հուշարձան տանող ճանապարհի մասին՝ պարոն Մանուկյանը նշեց, որ այն երկու խորհրդանիշ ունի. հիշեցնում է Գողգոթայի ճանապարհը, ինչպես նաև՝ մահվան երթերը, որոնցով Ցեղասպանության տարիներին հայերը շարժվում էին դեպի Դեր Զոր։ Տեղահանված հայերի մեծ մասը զոհվեց հենց այդ մահվան երթերի ժամանակ։ Եվ ամեն այցելու, գնալով դեպի հավերժ կրակ, որոշ չափով նմանեցնում է այդ երթերին։

Հուշարձանի 12 սյուները տարբեր մեկնաբանություններ ունեն. հուշարձանի համահեղինակ, ճարտարապետ Ս. Քալաշյանի մեկնաբանմամբ՝ այն հիշեցնում է ցավից բացված գերեզման։ Մեկ այլ մեկնությամբ՝ 12 սյուները խորհրդանշում են անմար կրակի վրա լացող մայրերին։ Սուրեն Մանուկյանը նշեց նաև, որ կոթողը համարվում է Հայաստանի վերածննդի հուշահամալիր։ «Հայոց ցեղասպանության հիմնական նպատակը հայերին վերացնելն էր, բայց այս հուշահամալիրը, անկախ Հայաստանը, ամեն օր այստեղ այցելող մարդիկ, ապացուցում են, որ հայերի բնաջնջման ծրագիրն իրականացնել չհաջողվեց։ Եվ հայերի ու Հայաստանի վերածնունդը խորհրդանշում է հուշարձանի վեր խոյացող սյունը»,- ասաց Հայոց ցեղասպանության ինստիտուտ-թանգարանի փոխտնօրենը։

Սուրեն Մանուկյանն աշակերտների հետ զրույցում նկատեց, որ Ցեղասպանությունը, ճիշտ է, ցավի ու ողբի պատմություն է, սակայն նաև քաջ ու հերոսական մարդկանց պատում է, օտարերկրացիների պատմություն, ովքեր իրենց գործունեությունը կապեցին հայ ժողովրդի հետ՝ փորձելով ինչ-որ չափով օգնել։

Ծիծեռնակաբերդից աշակերտները շարժվեցին դեպի «Եռաբլուր» պանթեոն, որտեղ ծանոթացան այնտեղ հանգչող մերօրյա հերոսների կենսագրությանը, սխրանքներին։
Նշենք, որ «Մարզային նախաձեռնությունների և զարգացման ծրագրերի կենտրոն» ՀԿ կողմից իրականացվող «Ազգային թեմաների կարևորությունն ու արդիականությունը դպրոցներում» ծրագիրը նպատակ ունի նպաստել մատաղ սերնդի շրջանում ազգային հարցերի նկատմամբ հետքրքրության աճին՝ բարձրացնելով Հայոց ցեղասպանության ճանաչման գործընթացին ուղղված ներկայումս իրականացվող ռազմավարության, պահանջատիրության, ինչպես նաև ՀՀ անվտանգության համար ցեղասպանության ճանաչման նշանակության մասին իրազեկվածության մակարդակը:

Հայաստանի երիտասարդական հիմնադրամի հասարակայնության հետ կապերի ծառայություն