ՀՀ առողջապահության նախարար Արմեն Մուրադյանն ընդունեց Հայաստանում Ճապոնիայի արտակարգ և լիազոր դեսպան Էյջի Տագուչիին:
Շնորհավորելով նորանշանակ դեսպանին` նախարարը նշեց, որ Հայաստանի առողջապահության բնագավառում Ճապոնիայի ժողովրդի և Ճապոնիայի կառավարության (Ճապոնիայի միջազգային զարգացման գործակալության (JICA) միջոցով) անհատույց օգնությամբ իրականացվել է դրամաշնորհային երեք ծրագիր:
«Անգնահատելի է Ձեր աջակցությունը Հայաստանի առողջապահական հիմնարկների տեխնիկական վերազիննման գործում»,- նշեց Արմեն Մուրադյանը` հավելելով, որ փոխգործակցությունը սկսվել է դեռևս 1997թ., երբ Հայաստանի կառավարությունը Ճապոնիայի կառավարությանը հայտ էր ուղղել «Արմենիա» բժշկական կենտրոնը, Ճապոնական ODA դրամաշնորհային ծրագրի շրջանակներում, սարքավորումներով հագեցնելու նպատակով:
Երկրորդ ծրագրում ընդգրկված էին հանրապետության երեք հիվանդանոցներ, իսկ 2005թ. տրվեց երրորդ համատեղ ծրագրի մեկնարկը, որի շնորհիվ աարքավորումներով հագեցան մարզային երկու (Հրազդանի և Գավառի) և երևանյան մեկ (Պերինատոլոգիայի, մանկարձության և գինեկոլոգիայի կենտրոն) ծննդատները:
«Կարծում ենք, որ համատեղ ծրագրերը շարունակական կլինեն»,- ընդգծեց ՀՀ առողջապահության նախարարը: Նա նաև բարձր գնահատեց «Թոշիբա մեդիքալ սիսթեմ» ճապոնական ընկերության կողմից մեր երկրում կատարված աշխատանքը, գրանցված հաջողություններն առողջապահական ոլորտում:
Արմեն Մուրադյանը հայտնեց, որ ընկերության ղեկավարի հետ վերջերս կայացած հանդիպմանը քննարկվել են համատեղ ծրագրեր իրականացնելու հեռանկարները: Նախարարը շեշտեց նաև, որ Հայաստանի համար հետաքրքիր է Ճապոնիայի առողջապահական համակարգի փորձը ոչ միայն ֆինանսավորման, այլև կառավարման տեսանկյունից: Մասնավորապես` կարևորվեց բնակչության առողջության պահպանման առաջնային օղակի հզորացմանն ուղղված քաղաքականությունը, որին են միտված նաև ՀՀ առողջապահության նախարարության վերջին շրջանում իրականացվող մի շարք ծրագրեր:
Դեսպանն ընդգծեց, որ Ճապոնիայի կառավարությունը պատրաստակամ է ընդլայնել Հայաստանի առողջապահության ոլորտում համագործակցությունը:
Հանդիպման ընթացքում քննարկվեցին նաև հանրային առողջությանը, առողջապահական այլ թեմաներին վերաբերող հարցերի:
.gif)
