Այսօր կառավարության շենքի դիմաց զանազան սոցիալական խմբերի հետ բողոքի ցույց էին անում նաեւ «Հաշմանդամ օդաչուների հասարակական կազմակերպության» անդամները: Նախկին օդաչուները, որոնք հաշմանդամությունը ձեռք էին բերել պրոֆեսիոնալ հիվանդությունների պատճառով, ժամանակին` մինչեւ 2005 թվականի վերջը, «Հայկական Ավիաուղիներից» ստանում էին հաշմանդամության փոխհատուցում: Սակայն ընկերության լուծարումից հետո ազգային փոխադրող հանդիսացող «Արմավիա»-ն հրաժարվեց իր նախորդի ֆինանսական պարտավորություններից: Որոշ փոխհատուցում նախկին օդաչուներին տրվեց «Հայկական Ավիաուղիների» Սեւանում գտնվող հողերի վաճառքից: Նախկին օդաչուները դիմեցին դատարան, որը բավարարեց նրանց հայցադիմումը` արձանագրելով, որ ընկերության լուծարումից հետո իրավահաջորդ չլինելու դեպքում փոխհատուցումը հատկացնում է պետությունը: Սա նաեւ աշխարհում ընդունված կարգ է. որոշ երկրներում փոխհատուցվում է օդաչուների նախկին աշխատավարձի 60-80 տոկոսը: Սակայն հայ օդաչուներն արդեն 4.5 տարի է` պայքարում են, բայց պետությունը ոչ մի փոխհատուցում չի տալիս: ԻԼ 86-ի հրամանատար Գագիկ Միրզոյանը եւ բորտ-ինժեներ Սերգեյ Կոտենյանը եւս պրոֆեսիոնալ հիվանդությունները ստացել են օդում: Գագիկը լսողության հետ կապված խնդիրներ ունի, իսկ Սերգեյը թռիչքի ժամանակ սրտի կաթված է տարել: «Սպորտսմենը 5 րոպեով հայկական դրոշը 10 մետր բարձրացնում է` ստանում է ամսական մինչեւ 650 հազար թոշակ: Տա Աստված` միլիոն ստանա, բայց ես ուզում եմ մեր կառավարությանը հիշեցնել, որ մեր դրոշը մենք բարձրացնում էինք 12 կիլոմետր եւ ման էինք տալիս ամբողջ Ասիայով, Աֆրիկայով եւ Եվրոպայով մեկ: Մենք արժանի չե՞նք մեր առողջությունը կորցնելու դիմաց փոխհատուցում ստանալու»,- ասաց Գագիկը, որը հպարտությամբ նշում էր, որ նախկին Խորհրդային Միությունում ԻԼ 86-ի հրամանատարները 50-60 հոգի էին: «Եթե դրա հետ մի վթար լիներ, չէր կոչվում կատաստրոֆա, կոչվում էր ազգային տրագեդիա, ինքաթիռը շատ թանկ էր եւ տանում եր 354 հոգի ուղեւոր»,- պատմում էր Գագիկը: Նրա խոսքով` ԻԼ 86-ին համարժեք Բոինգ 754-ի թոշակի ուղարկված հրամանատարը տարեկան ստանում է 250 հազար ԱՄՆ դոլարի չափ թոշակ: Օդաչուների հաշվարկով` իրենց փոխհատուցումը կազմում է տարեկան 10 միլիոն դրամ, մինչդեռ իրենց կուտակված պարտքերն արդեն հասել են 500 միլիոն դրամի. «Այդ գումարից պետք չէ սարսափել, քանի որ այսօր դատախազը թոշակի է գնում 1 միլիոն 300 հազար դրամ թոշակով, սպորտսմենը` 650 հազար»,- ասում է Գագիկը հավելելով, որ իրենք պահանջները ոչ միայն կառավարությունից են, այլեւ «Արմավիայից»,- «Իրավահաջորդ չի, բայց ինքն իրեն ներկայացնում է որպես ազգային փոխադրող, եւ դարձավ տասնյակ տարիների ընթացքում նաեւ մեր կողմից ստեղծված չվերթների տերը: Եւ այդ ամբողջը ստացավ ձրի»: Մեկ շաբաթ առաջ օդաչուները եղել են Արդարադատության նախարարի մոտ: Հրայր Թովմասյանը լսել է նրանց, սակայն ակնարկել է, որ ոչինչ չի կարող անել: Գագիկը եւ մյուսները մինչեւ անգամ Ստրասբուրգ` Մարդու Իրավունքների Եվրոպական դատարան են դիմել, սակայն հայցը մերժվել է` Հայաստանում բոլոր ներպետական ատյաններին դիմած չլինելու պատճառով: Եւ հիմա նրանք փակուղային վիճակում են. Վճռաբեկ դատարան չեն կարող դիմել, քանի որ անցել է վաղեմության ժամկետը, իսկ կառավարությունն էլ շարունակում է հրաժարվել փոխհատուցում տալուց: Օդաչուները, ոչ առանց հիմնավորման, նշում են, որ կառավարությունը այդ ամենը հաշվարկել է եւ որոշել` հարցը փակել չվճարելով, մինչեւ որ նրանք կդադարեն ֆիզիկապես գոյություն ունենալ: Ի դեպ, այս ընթացքում 130 հոգուց 30-ը մահացել են: ԱՆՈՒՇ ԴԱՇՏԵՆՑ
.gif)
