Բոլոր ընտանիքներում էլ վիճաբանությունների հավանականությունը բավականին մեծ է: Պատճառները կարող են տարբեր լինել, բայցևայնպես, վիճակագրությունը ցույց է տալիս, որ հիմնական մաս կազմում են սոցիալական և կենցաղային խնդիրները:
Երբեմն` վիճաբանությունները ողբերգական կամ անցանկալի ավարտ են ունենում, երբեմն` արագ հարթվում և մոռացվում: Եվ որպես կանոն՝ դրանց մասին բարձրաձայնվում է այն ժամանակ, երբ վիճաբանող կողմերից որևէ մեկը տուժում է:
Ներկայացնում ենք իրավիճակ, որտեղ երկու կողմում համատեղ ապրող կանայք են:
Այսպես, ընթացիկ տարվա օգոստոսին 59-ամյա Գոհարը փայտով հարվածել է եղբոր այրուն, որը նրա հետ նույն բնակարանում է ապրում: Փայտի հարվածով կինը չի բավարարվել. նա դիմել է նաև ձեռքի ուժին: Դրանից հետո Գոհարը ձեռքերով հարվածել է հարսի մարմնի տարբեր մասերին:
Հարց է առաջանում՝ ի՞նչը կարող էր կանանց միջև վիճաբանության պատճառ դառնալ, իսկ վիճաբանությունն էլ սրվել է այն աստիճան, որ բանը հասել է փայտով հարվածին:
Պարզվում է՝ Գոհարի և նրա հանգուցյալ եղբոր կնոջ՝ Գայանեի, թեժ վիճաբանության պատճառը բնակարանում էլեկտրաէներգիայի առանձին հաշվիչ տեղադրելու հարցն է եղել: Արդյունքում՝ տիկնանցից մեկը մարմնական վնասվածքներ է ստացել, մյուսը՝ հայտնվել ամբաստանյալի աթոռին:
ArmLur.am-ը մեղադրական եզրակացությունից տեղեկանում է, որ Գոհարին մեղադրանք է առաջադրվել ծեծի ենթարկելու հատկանիշներով, խափանման միջոց նրա նկատմամբ ընտրվել է ստորագրությամբ չհեռանալը:
.gif)
