Հանրապետական պատգամավոր Գագիկ Մինասյանը երեկ հայտարարել է, թե Լեւոն Տեր-Պետրոսյանի կողմից իշխանություններին ներկայացրած 15 կետից բաղկացած պահանջագիրը մշակվել է «գունավոր հեղափոխությունների կենտրոններում»: Իսկ նման հանճարեղ եզրահանգման հիմնավորումն այն է, որ Լեւոն Տեր-Պետրոսյանը պահանջել է Հայաստանում նվազագույն աշխատավարձը դարձնել 200 դոլար, գործազրկության նպաստը` դրա 50 տոկոսը (100 դոլար), իսկ միջին կենսաթոշակը` միջին աշխատավարձի 40 տոկոսը (112 դոլար): Եթե չենք սխալվում, Գագիկ Մինասյանը տնտեսագետ է, ուստի տրամաբանական կլիներ այն, որ նա փորձեր վերլուծել, թե որքանով է տնտեսապես հիմնավորված եւ իրատեսական Տեր-Պետրոսյանի առաջադրած այդ պահանջը: Բայց, քանի որ այդ դեպքում ստիպված էր լինելու հանդես գալ կա՛մ որպես վատ տնտեսագետ, կա՛մ որպես վատ հանրապետական, Մինասյանը որոշել է հարցին անդրադառնալ որպես վատ դեմագոգ եւ հայտարարել. «Ցանկացած քաղաքական ուժ, որը գործում է Հայաստանում եւ գործում է հայ ժողովրդի համար, բնականաբար, իր ազգային դրամով պետք է իր արժեքները ներկայացնի, այն արժեքները, որոնք նա գտնում է, որ պետք է փոխհատուցվեն քաղաքացիներին: Հակառակն ուղղակի աբսուրդ է»: Իրականում աբսուրդն այն է, որ իշխող կուսակցության տնտեսագիտական մտքի տիտանը չի կարողացել Տեր-Պետրոսյանի ներկայացրած համապարփակ պահանջագրին պակաս ծիծաղելի պատասխան գտնել: Հատուկ պարոն Մինասյանի համար հիշեցնենք, որ, օրինակ, ՀՀ մաքսային ծառայություններում մաքսավճարները հաշվարկվում եւ գանձվում են դոլարով (եթե չգիտի, թող հարցնի ներկրմամբ զբաղվող տնտեսվարողներին): Ու, փաստորեն, ստացվում է, որ երբ խոսք է լինում քաղաքացիներին փոխհատուցելու վերաբերյալ, Մինասյանն ու իր կուսակցությունը հիշում են ազգային դրամի մասին, իսկ երբ հերթը հասնում է նույն այդ քաղաքացիներից մաքսային վճարներ գանձելուն, ապա Մինասյանն ու իր կուսակցությունը գերապատվությունը տալիս են «գունավոր հեղափոխությունների կենտրոնի» արժույթին` դոլարին: Հետաքրքիր է նաեւ, թե ինչու Մինասյանը իր կուսակցական օլիգարխ-ընկերներին չի բացատրում, որ եթե նրանք «հայ ժողովրդի համար գործող քաղաքական ուժի անդամներ են», ապա իրենց կողմից ներմուծվող ապրանքները չպիտի այդ ժողովրդի համար օր օրի թանկացնեն` իրենց եկամուտները հաշվարկելով բացառապես դոլարով: Իսկ ինչ վերաբերում է «գունավոր հեղափոխությունների կենտրոններից» Հայաստանում մշակվող ծրագրերին, ապա նշենք, որ այդ կենտրոնների ղեկավարներն այնքան հիմար չեն, որ գումարներ ծախսեն տարբեր ընդդիմադիր ուժերի վրա: Ինչի՞ համար: Բավական է խնդրել վարչապետ Տիգրան Սարգսյանին հաճախակի ելույթ ունենալ հեռուստատեսությամբ, եւ հասարակության ագրեսիան պատրաստ է:
.gif)
