ՏԵՍԱՆՅՈՒԹ. Հայտնի են խմբակցությունների ղեկավարների և քարտուղարների անունները

Կենտրոնական ընտրական հանձնաժողովը երեկ հաստատեց 8-րդ գումարման ԱԺ-ի պատգամավորի մանդատ ստացած անձանց ցանկը։ Արդյունքում օգոստոսի 2-ին մեկնարկող նստաշրջանում «Քաղաքացիական պայմանագիր» կուսակցությունը կունենա 71, «Հայաստան» դաշինքը 29, «Պատիվ ունեմ» դաշինքը 7 պատգամավորական մանդատ: Արդեն հայտնի է, թե ովքեր կղեկավարեն ԱԺ երեք խմբակցությունները։ ՔՊ-ի խմբակցության ղեկավար կլինի Հայկ Կոնջորյանը, քարտուղարը՝ գյումրեցի պատգամավոր Նազելի Բաղդասարյանը։ ԱԺ նախագահի թեկնածուն Ալեն Սիմոնյանն է, փոխնախագանները՝ Հակոբ Արշակյանը եւ Ռուբեն Ռուբինյանը։ «Հայաստան» դաշինքի խմբակցության ղեկավարը կլինի ՊՆ նախկին նախարար Սեյրան Օհանյանը, քարտուղարը՝ ՀՅԴ-ական Արծվիկ Մինասյանը։ Նրանց ԱԺ փոխնախագահի թեկնածուն ՀՅԴ-ական Իշխան Սաղաթելյանն է։ «Պատիվ ունեմ» դաշինքի խմբակցության ղեկավարը լինելու է ԱԱԾ նախկին տնօրեն Արթուր Վանեցյանը:

ArmLur.am-ի տեղեկությունների համաձայն, Պատիվ ունեմ խմբակցությունը դեռևս որոշում չունի խմբակցության քարտուղարի հարցում: Մեր տեղեկություններով՝ վաղը` հուլիսի 24-ին, կհավաքվեն, որպեսզի որոշում կայացնեն այդ հարցում: Բանն այն է, որ քննարկվում է երկու թեկնածուի անուն՝ ՀՀԿ-ական Հայկ Մամիջանյանի և Տիգրան Աբրահամյանի, բայց թե վերջնական ինչ որոշում կկայացվի, դժվար է ասել:

Նշենք նաև, որ առաջիկա օրերին պետք է բաշխվեն պատգամավորական մանդատները: Իշխանությունը որոշել էր այն կազմակերպել այս շաբաթ, սակայն, ԿՀԸ նախագահ Տիգրան Մուկուչյանի առողջական խնդիրների պատճառով, օրը հետաձգվել է: Այսինքն՝ առաջիկա շաբաթվա մեջ բոլորը կստանան նաև իրենց մանդատները, որպեսզի օգոստոսի 2-ին մասնակցեն ԱԺ 8-րդ գումարման առաջին նիստին:

Սոնա Գրիգորյան