Մերձավոր Արևելքում իրավիճակը թեժանում է. ՌԴ ԱԳՆ-ն դիմել է իր քաղաքացիներին

Մերձավոր Արևելքում իրավիճակը թեժանում է: Իսրայելի տարածքի հրետակոծությունը, հրթիռային և ռմբակոծությունները Գազայի հատվածի հյուսիսային և այլ շրջանների վրա, ինչպես նաև զինված միջադեպերը Լիբանանի և Իսրայելի միջև Կապույտ գծի տարածքում շարունակվում են։ Զոհերի ու վիրավորների թիվն աճում է: Ամբողջ աշխարհում բողոքի զանգվածային ցույցեր են տեղի ունենում։

Այս մասին հաղորդագրություն է տարածել ՌԴ ԱԳՆ-ն, որում նաև ասված է.

«Այս կապակցությամբ մենք խստորեն խորհուրդ ենք տալիս Ռուսաստանի Դաշնության քաղաքացիներին զերծ մնալ տարածաշրջան մեկնելուց, հատկապես Իսրայել, Լիբանան, Հորդանան և պաղեստինյան տարածքներ: Այս երկրներով ճանապարհորդելիս պահպանեք առավելագույն զգուշություն և անձնական անվտանգության ուժեղացված միջոցառումներ, խուսափեք կոնֆլիկտային և ռիսկային տարածքներից, հետևեք տեղական իշխանությունների առաջարկություններին, ինչպես նաև Ռուսաստանի արտասահմանյան առաքելությունների հաղորդագրություններին:

Եգիպտոսի և Իսրայելի իշխանությունների հետ սերտ աշխատանքը շարունակվում է՝ ապահովելու Ռուսաստանի քաղաքացիների ելքը, ովքեր օգնություն են խնդրել Գազայի հատվածից տարհանման հարցում:

Մենք մշտապես վերահսկում ենք տարածաշրջանում օդային երթեւեկության հետ կապված իրավիճակը։ Իսրայելից, Լիբանանից, Հորդանանից և այլ երկրներից կանոնավոր ավիաընկերությունների թռիչքների հնարավորությունները մնում են հասանելի: Հոկտեմբերի 9-ից Թել Ավիվից Ռուսաստան է ժամանել մոտ 6 հազար մարդ»։

ՌԴ նախագահի հանձնարարականի համաձայն՝ հոկտեմբերի 19-ին ՌԴ ԱԻՆ հատուկ չվերթով մարդասիրական օգնություն է հասցվել (27 տոննա ընդհանուր քաշով ալյուր, շաքարավազ, բրինձ և այլ պարենային ապրանքներ) Էլ-Արիշի օդանավակայան (Եգիպտոս) և հանձնվել Եգիպտոսի Կարմիր մահիկի ընկերության ներկայացուցիչներին Գազայի հատվածի բնակչության համար։