ՏԵՍԱՆՅՈՒԹ․ Գյուղի խանութները տուգանում են, իսկ չլիցենզավորված ապրանքների վաճառքը շարունակվում է. «Ժողովուրդ»

«Ժողովուրդ» օրաթերթը գրում է. «Մինչ Հայաստանի Կառավարությունը փնտրում է ելքեր Հայաստանի Հանրապետության 2025 թվականի բյուջեի 609 մլրդ դրամ դեֆիցիտը լրացնելու համար, իրականում որևէ գործնական քայլ չի արվում զարտուղի ճանապարհներով ներկրված ապրանքների շրջանառությունը դադարեցնելու համար:

Բանն այն է, որ բյուջեի պլանավորված ծախսերը կատարելու համար Կառավարությունը մտադիր է պարտք վերցնել՝ ներքին ու արտաքին։ Կթողարկվեն պետական պարտատոմսեր, ինչպես նաև վարկեր կվերցվեն միջազգային կազմակերպություններից և օտարերկրյա պետություններից։

Սրան գումարվում են նաև այն հարկային պարտավորությունները, որոնք դրվում են կամ դրվել են հասարակ աշխատանք իրականցնող և մանր և միջին բիզնես ունեցող անձանց վրա։ Սակայն անօրինական և լիցենզիայի բացակայությամբ վաճառքների վերջն այդպես էլ չի տրվում։

Օրինակ՝ List.am-ից շատ հեշտ եղանակով կարելի է գնել ծխախոտ, որը խանութներում ունի վաճառքի սահմանափակումներ։ Եթե խանութում մինչև 18 տարեկանները ծխախոտ չեն կարող գնել, ապա համացանցում դա չի կառավարվում։

Նույն կայքից հեշտ կարելի է ձեռք բերել խմիչքներ։ Օրինակ 30 հազար դրամանոց խմիչքը, որի վաճառքից ստացած եկամտի մի մասը կգնա պետական բյուջե, օնլայն հարթակից կարելի է ձեռք բերել 10-15 հազար դրամ արժողությամբ և չվճարել պետական տուրքերի, հարկերի համար նախատեսված հավելյալ արժեքը։

Նմանատիպ օրինախախտումների բացահայտման, իրավական և հարկային դաշտ բերելու միջոցով թերևս պետք է լցնել այն դեֆիցիտը, որի համար աստիճանաբար քայքայվում է աշխատաշուկան։ Գյուղերում, օրինակ վարդենիսցիների խանութներում, 60-120 մլն դրամով տուգանում են նաև չլիցենզավորված ապրանք վաճառելու համար, բայց օնլայն հարթակում անխոչընդոտ վաճառք կա:

Եվ եթե գործող կառավարությունը չի կանխում, 2 պատճառ կարող է լինել. կա՛մ չեն կարողանում, կա՛մ չեն ուզում: Երկու դեպքում էլ խայտառակություն է»:

Մանրամասները՝ «Ժողովուրդ» օրաթերթի այսօրվա համարում:

Մանրամասները՝ տեսանյութում։