«ԱՊՀ+Իրան» կամ «ԱՊՀ+1» ձևաչափը պետք է ստեղծվի որպես ճկուն և արդյունավետ մեխանիզմ երկխոսության և համագործակցության համար: Այս մասին ասել է Իրանի նախագահ Մասուդ Փեզեշքիանը՝ Թուրքմենստանում ԱՊՀ պետությունների ղեկավարների խորհրդի նիստում ունեցած ելույթում:
««Անկախ պետությունների համագործակցության երկրներ + Իրան» կամ «ԱՊՀ+1» ձևաչափը պետք է ստեղծվի որպես ճկուն և արդյունավետ մեխանիզմ երկխոսության և համագործակցության համար»,- ասել է նա։
Փեզեշքիանը հավելել է, որ տարածաշրջանային դիվանագիտությունը պետք է դառնա ճգնաժամերի կառավարման, կապի պահպանման, հակամարտությունների տարածման կանխարգելման և գործնական համագործակցության ակտիվացման գործիք։
Նրա խոսքով՝ Իրանը ցանկանում է կապեր, այլ ոչ թե ֆրագմենտացիա, համագործակցություն՝ կործանարար մրցակցության փոխարեն, փոխկախվածություն՝ միակողմանի կախվածության փոխարեն, և անվտանգություն՝ հիմնված վստահության և ընդհանուր շահերի վրա, սպառնալիքների վրա հիմնված անվտանգության փոխարեն:
Նա նշել է, որ Իրանը «դարպաս» է, որը միացնում է Կենտրոնական Ասիան բաց ծովին, իսկ երկրի նավահանգիստները Պարսկական և Օմանի ծոցերում մուտք են ապահովում դեպի Հարավային Ասիա, Աֆրիկա և Եվրոպա։
Փեզեշքիանն ընդգծել է, որ «Հյուսիս-Հարավ» և «Արևմուտք-Արևելք» միջանցքները մրցակիցներ չեն, այլ միասնական տարածաշրջանային ցանցի տարրեր։ Ավարտին նախագահը հույս է հայտնել, որ այս գագաթնաժողովը կդառնա գործնական քայլ մի տարածաշրջանի ձևավորման ճանապարհին, որտեղ Միջին Ասիան, Հարավային Կովկասը և Իրանը կներկայացնեն ոչ թե ցրված տարածությունների համախումբ, այլ համագործակցության միասնական ցանցի մաս։
.gif)
