ՀՀ կառավարության այսօրվա նիստում հավանության է արժանացել «Ուսման վարձի առավելագույն չափի սահմանում՝ ըստ կրթական աստիճանների և հավատարմագրման արդյունքների» որոշումը, որը կարգավորում է Հայաստանի Հանրապետությունում բարձրագույն մասնագիտական կրթական ծրագրեր իրականացնող ուսումնական հաստատություններում անկախ դրանց գերատեսչական ենթակայությունից և կազմակերպական-իրավական ձևից, ինչպես նաև՝ ուսուցման ձևից (առկա, հեռակա, հեռավար), իրականացվող հիմնական կրթական աստիճաններով (բակալավր և մագիստրոս), հավատարմագրման արդյունքների վրա հիմնված, ուսման վարձի առավելագույն չափի սահմանման հետ կապված հարաբերությունները:
Կրթական աստիճանների և հավատարմագրման արդյունքների վրա հիմնված ուսման վարձի առավելագույն չափը ուսման վարձի այն շեմն է, որը ուսումնական հաստատությունը կարող է սահմանել տվյալ մասնագիտության գծով կրթական ծառայություններ մատուցելու համար:
Նշված որոշումով սահմանվում է միջազգային կառույցների կամ Որակի ապահովման ազգային կենտրոնի կողմից հավատարմագրված ուսումնական հաստատության ըստ կրթական աստիճանների (բակալավր և մագիստրոս) և հավատարմագրման արդյունքների (ինստիտուցիոնալ պայմանական, ինստիտուցիոնալ, ծրագրային պայմանական, ծրագրային) վրա հիմնված ուսման վարձի առավելագույն չափը, ինչը կխթանի բարձրագույն ուսումնական հաստատություններին բարձրացնելու մատուցվող կրթական ծառայությունների որակը:
Ըստ այդմ՝ բակալավրի կրթական աստիճանում ուսման վարձի առավելագույն շեմը կարող է լինել 800 հազար դրամից մինչեւ 1 մլն 200 հազար դրամ, մագիստրոսի կրթական աստիճանում վարձավճարի առավելագույն չափը կարող է տատանվել 900 հազարից մինչեւ 1 մլն 300 հազար դրամ։
ՀՀ կառավարություն
.gif)
