Երկու օր առանց էլեկտրասնուցման է մնացել Երեւանի Թամանյան 3 շենքը, որի բնակիչներն ահազանգով դիմել էին “Ժողովուրդ”-ին: Նրանք անհանգստացած էին, որ իրենց շենքի հոսանքագծերն անօրինական տեղափոխում են նոր հարեւանի՝ ՀՀ նախկին վարչապետ Արմեն Սարգսյանի բնակարանի վերանորոգման պատճառով:
Թաղամասի բնակիչների տեղեկացմամբ՝ Արմեն Սարգսյանը գնել է Թամանյան 3 շենքի 5-րդ հարկում գտնվող թիվ 3 բնակարանը, որի տանիքը քանդելով՝ տարածքի մակերեսով մեկ կառուցում է 6-րդ հարկ: “Իսկ մենք պարտավոր ենք հանդուրժել, որ նրա պատճառով մեր ամբողջ շենքի հոսանքը կտրեն”,-ասում են նույն շենքի բնակիչները:
Հինգերորդ հարկի բնակիչ 82-ամյա Գագիկ պապը “Ժողովուրդ”-ին ասաց, որ խնդրի առթիվ բողոքել են նաեւ “Հայաստանի էլեկտրական ցանցեր” ՓԲԸ-ին, որտեղից ստացած պատասխանն ավելի է զայրացրել իրենց: “Եկան, ուսումնասիրեցին եւ ասացին՝ մենք ոչնչով օգնել չենք կարող: Ամբողջ հոսանքագծերը պետք է տեղափոխել, քանի որ դրանք խանգարում են նոր բնակարանի կառուցմանը: Մեր ընկերության ֆինանսական միջոցները չեն ներում հարցը լուծելու համար, այդ պատճառով այն պիտի լուծվի բնակիչներից գումարներ հավաքագրելու միջոցով”,-ասաց նա:
“Հայաստանի էլեկտրական ցանցեր” ՓԲԸ-ից փորձեցինք պարզել, թե ինչով է պայմանավորված նման հայտարարությունը, ինչու պետք է մեկ բնակչի պատճառած վնասը փոխհատուցվի շենքի բնակիչների կողմից: ՓԲԸ-ի հասարակայնության եւ ԶԼՄ-ների հետ կապերի դեպարտամենտի ղեկավար Նատալյա Սերջանյանը մեզ տեղեկացրեց, որ նշված բաժանորդների սպասարկման տեղեկատվական կենտրոնում շենքի բնակիչների կողմից ոչ մի ահազանգ չի ստացվել: ,Ինչ վերաբերում է նոր բնակարանի հոսանքի անցկացմանը, այդ բնակարանի սեփականատերն իր համար ապահովում է պահուստային սնուցում: Այնպես որ, տվյալ բնակիչը չի կարող խաթարել ամբողջ շենքի հոսանքի մատակարարումըե,-պատասխանեց Ն. Սերջանյանը:
Հ.Գ. Մինչ հոդվածը պատրաստվում էր տպագրության, խմբագրություն զանգահարեց Գագիկ պապը եւ տեղեկացրեց, որ արդեն լույս ունեն: “Չնայած վստահ չեմ, թե այս հարցը վերջնականապես լուծված է, որովհետեւ հոսանքազրկումը պարբերաբար կրկնվում է”,-նշեց նա:
ՍՈՒՍԱՆՆԱ ՄԱՐՏԻՐՈՍՅԱՆ
.gif)
